譚俊彥奶爸再出發
育有一對子女的無綫視帝譚俊彥（Shaun）早年曾北上發展，輾轉回歸香港影視圈，現時傾向留港拍劇，全因較具安全感及有多些時間多陪伴家人。Shaun揚言現階段以家人行先，賺錢反而是其次：「見到小朋友一日一日長大，感到背後動力愈來愈強大！」果然是愛回家的好男人。
為演好無綫劇集《企業強人》徐道明一角，Shaun事前做足功課配合角色，劇中飾演商界強人，為賺錢只講實際及數據。不過，現實中身為西餐廳老闆的Shaun竟對數字毫不精明，管數此等重任交給拍檔負責。他更自言連網上銀行、電子支付App也沒有，外出與友人飯局結賬也要由太太代勞過數給朋友。對於《企業強人》播出時，Shaun跟張曦雯的三秒鐘床戲成為網上熱話，她指監製不欲觀眾太集中焦點在床戲，當然太太亦不太喜歡。
自言生活似足陳豪
劇中，Shaun與陳豪（阿Mo）分別飾演企業家徐道明及趙愷，雙方做生意的理念不同，並有不少對立面。提及兩大視帝對決，Shaun並不認同：「我覺得係兩個『奶爸』，阿Mo好sweet，佢依家所有精神、時間都放喺家庭，我覺得同佢好似！」Shaun自言除了休息，所有時間也放在家庭，兩個「奶爸」碰頭當然話題不絕。他說：「我哋除咗演戲、家庭及小朋友教育外，大家嗜好亦接近，對電子產品都有興趣，就連龔嘉欣都插唔到嘴！」不過，Shaun與嘉欣同樣涉足飲食業，大家當然大談生意經。不少藝人近年闖內地開拓巿場，Shaun卻反其道而行寧願留港發展，他自認是住家男人：「可能係咁，所以我哋兩個（指與阿Mo）仲喺TVB唔向外闖，因為可以返屋企食飯，有時喺屋企附近拍戲，阿仔又可以陪我食飯。」
曾外地闖蕩愛留港
Shaun熱愛家庭生活，經常在社交平台分享與子女享受家庭樂的照片，他坦言現階段親情比賺大錢重要：「我見到小朋友一日一日長大，感到背後動力愈來愈強大，仔女越來越高，出去唔打得都睇得！」他初入行先入影圈，曾拍攝青春片《慌心假期》，亦曾在《男人四十》飾演張學友兒子，近年亦在《爆裂點》演奸角。入行25年的Shaun事業、家庭皆美滿，同時在電視圈闖出成績拿下視帝，Shaun對此說：「以前搏殺可以放棄很多事去衝，我同好多無綫成長嘅同事唔同，佢哋想去睇外面個世界，但我入行25年，試過喺內地、台灣、馬來西亞發展，覺得最舒服係香港！」Shaun在2016年加入無綫拍攝《天命》，其後憑《包青天再起風雲》、《十八年後的終極告白》等獲電視觀眾歡心，他指無綫的魔力就是入屋：「我最初入TVB見到李成昌，雖然大家唔認識，但感覺好熟絡，因為由細睇佢（劇集）睇到大。」另一個原因令他安於留港，全因這地方令他具安全感：「好多時出街都會有人同我搭訕，老婆見我哋傾得好投契，就問我同佢哋係唔係好熟，我就話其實唔識對方，以前我會好驚，但依家就感受到拍劇入屋嘅好處。」
為子女變健談風趣
談及作為「大俠」狄龍之子，多年來「以父之名」是否有演戲包袱，Shaun回想道：「自己細個時啲人會話『你阿爸冇做大佬好耐喇』，對我小時候有好大影響，我阿爸為咗我都減少演黑幫戲；到依家我個仔都會遇到咁嘅情況，我要教育佢。」Shaun承認得到視帝是事業上一個里程碑，以前沒有去想下一個目標要做什麼，但現在目標明確，就是將歡樂帶給觀眾：「依家大家日子過得辛苦，就想拍多啲直接嘅喜劇，好似我睇我個女最直接嘅嘢就最好笑。」以往Shaun不苟言笑，成家後變得健談風趣，相信家人居功不少。談及一對子女，Shaun即時眉飛色舞，笑指女兒是「宅女」，平日愛看書及留家，就算出外旅遊也愛留在酒店；愛兒則性格活躍，父子最愛砌LEGO：「家中已有不少成品，但每次玩至少2小時，太太都會呷醋。」
