新雲佩斯「升呢」 阿迪達激讚
夏維斯連續7場主場入波
上季英超爭標功虧一簣的阿仙奴，今季延續上季佳績及氣勢，至今仍保持不敗，當中包括上周末主場對修咸頓之戰，在先失一球卻能反勝3:1完場。「兵工廠」主力球星夏維斯今季表現更上一層樓，至今各項賽事10戰交出6入球1助攻，今場更寫下連續7場主場賽事入波，追平球會名宿雲佩斯紀錄，難怪賽後獲主帥阿迪達點名激讚，指其級數升呢，有力單季攻入廿球！
阿仙奴前晚對「聖人」之戰，半場雙方互無紀錄，但客隊換邊後10分鐘由甘馬倫阿奇入波領先，可幸「兵工廠」不慌不忙之後連下三城反勝，其中為球隊扳平的夏維斯，前年夏天由倫敦死敵車路士來投，卻一直憑表現贏得「廠迷」支持及信任，今季表現再有突破。
主帥阿迪達賽後說：「你哋都會發現佢信心持續增強，佢會主動拎波、帶波。佢參與逼搶、跑勻全場，仲有喺禁區內攞波嘅位置；佢本身係個進攻中場，依家踢9號位，但就係無處不再，有強大嘅足球智慧。佢依家會專注於為球隊贏波，去實現一切，根本唔同晒。」
該西班牙領隊深信夏維斯會變身頂級射手，單季入20球或以上：「當我哋練波嗰陣，佢唔會滿足自己已有嘅一切，不斷尋求進步，我認為佢已經『升咗呢』。佢身邊有班好球員，但最主要係佢信心強咗，佢更好咁掌控比賽，真係冇得彈。始終一個射手只要改變一啲細節同思想，就會有重大提升。」其實在賽前記招，阿迪達已經指出，球隊隊員之間充滿愛同信任，係令25歲的夏維斯再有進步主因。
愛滿酋長球場 倒戈門神落淚
提起阿仙奴充滿愛，就連今場倒戈出戰的修咸頓門將蘭斯達爾，亦深深感受到酋長球場的愛。當賽前熱身，主場球迷高呼今夏離隊門將蘭斯達爾名字，這位英格蘭門神已流下男兒淚。雖然作出了3次撲救，但蘭斯達爾仍未能阻止前東家贏波，賽後他仍獲前「波士」阿迪達安慰。阿迪達亦向傳媒解釋他在賽後走到蘭斯達爾身邊說過的話：「我祝福佢未來，同恭喜佢打得好好，佢哋（修咸頓）係支好球隊。」
