巴西又輸！雲尼斯奧斯賴地慢
足球王國？金球獎大熱？擁有皇家馬德里球星雲尼斯奧斯壓陣的足球王國巴西，昨晨在世盃外南美洲區作客巴拉圭，最終慘輸0:1，錄得該隊近5場世盃外的第4場敗仗。相隔16年再次在法定時間不敵巴拉圭，被視為國家恥辱，而今年金球獎大熱的雲尼斯奧斯，賽後則公開道歉，也坦承自己在國家隊欠缺足夠信心，兼且賴地慢！
効力國際邁亞密、身為美斯球會隊友的迪高高美斯，為巴拉圭一箭定江山射死巴西。賽後「森巴兵團」在積分榜排名第5，出線形勢尚可，但8戰只得3勝1和4負的成績，對「足球王國」而言肯定難以收貨。
雲尼斯奧斯歷來代表巴西出戰34場僅入5球，今場表現亦依然平平，他賽後表示：「我哋明白依家個情況，大家都好想帶領巴西走出低谷，我哋全部人返屋企都會反省可以做啲乜，喺將來贏波。我知自己能力，只係信心不足令情況變得複雜。呢度嘅球場情況令球賽速度變得較歐洲慢，我哋必須適應先會贏波。我想向球迷道歉，我知依家係艱難時刻，我哋都想改進。」
