物業投資者棄車保帥
湯文亮博士 紀惠集團行政總裁
近日有不少物業投資者減價出售物業，部分更加要蝕讓，亦有一些是優質物業，按正常情況，投資者是不會出售，現在是否睇唔好後市，投資者才會減價賣樓。
就算投資者睇好樓市都冇用，面對銀行便秘，有入冇出，即是call loan與唔放數，以及利息上升，租客仍未復原，租金收入減少，最直接方法是賣走手上一些物業，以現在時勢，唔係優質物業都很難賣得走，物業投資者唯有棄車保帥，將手上最優質的，甚至是自用或者自住的物業賣走，希望可以渡過難關。
對銀行不敢寄以厚望
現在物業投資者對銀行都不敢寄以厚望，唔好話借錢畀人買樓，唔call loan已經是功德無量，而且大家都有一個感覺，銀行是不會在短期內回復正常，銀行唔放貸，投資者就要自尋出路，雖然賣走一些非常優質的物業是很悲傷，但總好過被銀行沒收手上物業，如果銀行以銀主身份出售投資者物業，樓價更加慘不忍睹，甚至賣完仍然可能會被銀行call loan，所以，不如以棄車保帥心態由自己賣，樓價一定會比銀行揸fit賣好得多，棄車保帥是沒有辦法中辦法，目的只是生存。
講開又講，不少人生意唔好，擔心銀行call loan，搞到唔瞓得，市面上經濟蕭條，吉舖逐漸增加，政府都唔知點樣解決，其實，關鍵在銀行，如果銀行唔再便秘，即是唔再向借貸比率合格的業主call loan，而又肯借錢畀人買樓以及做生意，市面一定可以很快回復生機。
