魏浚笙送大篋零食 鄭秀文讚有前途
紅館騷尾場 3度Encore
天后鄭秀文（Sammi）第13場紅館演唱會前晚圓滿結束，邀得型男魏浚笙（Jeffrey）任尾場嘉賓。Sammi自認有眼光，因Jeffrey未當歌手前，已邀對方合唱。至於Jeffrey用大篋裝滿零食送給Sammi，希望她完騷後去旅行充電，獲Sammi讚識做兼有前途。
鄭秀文介紹魏浚笙出場時大讚高大靚仔，全場女士都會心心眼，果然Jeffrey甫現身，全場歡呼！二人合唱《不要驚動愛情》，Jeffrey唱畢說：「多謝Sammi姐姐帶我嚟呢個舞台。」Sammi笑言：「好彩係姐姐唔係姨姨！大家都知道我鍾意同新歌手、音樂人合作，舊年我邀請Jeffrey合唱《致我們的夢想》。」Jeffrey說：「當時我一首歌都未開始唱，仲以為收錯邀請。」Sammi得戚說：「我幾叻，睇到你幾唱得又靚仔，點可能唔做歌手？好開心你依家有咁好成績。」
Jeffrey送上一個裝滿豬肉乾、豬肉鬆等零食的大旅行箱給Sammi，希望她完騷後去享受一個開心旅程，Sammi說：「識做，果然有前途！」全場大笑。之後Jeffrey獨唱《失約巴黎》，又跟Sammi跳唱《致我們的夢想》，將氣氛推上高峰。
許志安豎起手指公讚好
至於每場都跟Sammi合唱《世紀末煙花》的許志安，離場前向Sammi豎起兩隻手指公讚好，Sammi則握拳放在胸前及點頭微笑，勝過千言萬語。之後Sammi獨唱《交換溫柔》，全場亮起手機燈及大合唱，令她感動得淚流滿面，停頓了一會好好欣賞，接受大家的愛。
Encore環節，雖然今次演唱會不設握手環節，但Sammi拿着玩具手跟觀眾「握手」，非常有趣。她連續唱《如果我們不再見》、《千年如一日》和《我們都是這樣長大的》後跟觀眾揮手道別。不過全場觀眾不肯離開，大嗌Encore，她再度出場唱《捨不得你》後鞠躬離場，但觀眾仍不肯散場，繼續吶喊，Sammi只好再三出場，分別唱出《唯獨你是不可取替》和《衝動點唱》，之後她說：「我收工啦，拜拜！」演唱會才正式結束。
