備戰廣州個唱 鍾嘉欣全面復出
歐遊做「阿四」 玩得唔夠喉
鍾嘉欣2015年下嫁醫生老公後移居加拿大，專心相夫教子，逐漸淡出幕前，只偶爾為無綫拍劇或回港出席商演。昨日她出席活動時透露忙於為8月的廣州演唱會作準備，更宣布結婚後休息至今，決定全面復出！
鍾嘉欣昨日到尖沙咀出席保險活動，她表示剛與家人完成約一個月的歐洲之旅，終於有機會獨自返港工作，她說：「真係要多謝老爺同奶奶，因為老爺80大壽，奶奶特登用咗成年Plan行程，完成咗老爺嘅生日願望，一齊坐郵輪旅行。」不過她坦言最初很擔心3個小朋友未必適應長時間旅行，結果她與老公整個旅程都做「阿四」，更笑言要去多一次旅行放鬆才夠。她開心稱遊覽了很多名勝景點，但最吸引她的地方竟是當地街市！鍾嘉欣笑言成為母親後很喜歡行街市：「我俾當地嘅街市大開眼界，好大好多顏色，啲糖果乜嘢形狀都有，睇到我嘩、嘩、嘩、嗌出嚟！」
希望舉行世界巡唱
她表示去完旅行後增磅不少，自己也不敢上磅，故要努力操肌。提到她在社交網上載健身短片，網民讚她腹肌強勁，她笑言只是陰影，現時要加緊練歌：「雖然8月會喺廣州開騷，但去旅行冇理由自己匿埋練歌。」她坦言今次不會帶小朋友去廣州：「佢哋寫咗卡畀我，叫我加油，我應承佢哋今次會做到最好，到下次佢哋嚟睇，一定會睇到媽咪好勁。」
鍾嘉欣坦言等了多年才有機會開演唱會，有點感觸：「由結婚開始有啲傷心，傷心唔係因為結婚，係我突然消失，作為粉絲嘅偶像突然走咗，佢哋會唔開心，所以我上番台唱歌。（回歸樂壇？）係全線回歸，乜都得，主持、舞台劇、電影、奸角、打女，幻想就會變成真實。」她希望能到各地舉行巡唱，並強調香港站是她必然之選。
