延續58年無冠魔咒 修夫基功過難定
英格蘭飲恨失冠，自1966年在地頭稱霸世界盃後，經已相隔58年無冠，究竟是「三獅兵團」與冠軍絕緣，還是「無冕殺神」隊長哈利卡尼命硬，實在難講。主帥修夫基領軍連續兩屆歐國盃打入決賽敗陣，有球迷批評他領軍方式保守未夠班，有人卻也讚賞他已是近代最強英軍教頭。將於年底約滿的他，賽後拒談去留問題，一切仍存變數。
對於不敵西班牙，「修哥」可是心服口服：「我覺得佢哋係今屆賽事最佳球隊，我哋保持控球權做得唔好，但仍奮戰到最後，所有球員都為國家榮辱而戰，傾盡全力，我為大家感到驕傲。球隊入面大部分都唔止會繼續出戰世盃、甚至下屆歐國盃，未來依然值得期待。」
關於其個人前景，修夫基回應：「我唔覺得依家係做決定嘅理想時候，我仲要搵適合嘅人傾傾，總之唔係依家啦！」英格蘭連續兩屆歐國盃打入決賽，近兩屆世盃則分別闖入四強與八強，修夫基的功過仍要由大家評定。
至於備受期待的金球獎競爭者之一的祖迪比寧咸，賽後也極度失望：「咁樣輸咗真係好殘忍，再一次我哋冇打出最好表現，認真心碎。」
