集中培育囝囝 陳山聰老婆封肚
幫袁偉豪平反 演奸角唔使有型
陳山聰前晚率領劇集《反黑英雄》演員錄影扮嘢節目，原本有份出席的袁偉豪以家中有事為由臨時缺席。育有一子的山聰表示現在是搏殺期，加上年紀不小，與太太商量後決定專心培育兒子成才，無意再生小朋友，一個夠晒數！
無綫綜藝節目《福祿壽訓練學院畢業Party感謝祭》前晚錄影，劇集《反黑英雄》演員陳山聰、姚子羚、袁偉豪（Ben）、朱晨麗等擔任嘉賓，不過Ben臨時缺席。據知，Ben的囝囝發高燒至39度，他要照顧囝囝才被迫甩底，原本他都想出席活動，不過工作人員叫他專心照顧囝囝，才打消念頭。
山聰表示代表《反》劇宣傳，加上應該將機會留給後生仔，故他不用「扮嘢」，但自爆在家中經常扮「牛牛」給囝囝騎，並指囝囝愛扮蜘蛛俠。他說：「囝囝7月1日4歲生日，到時會一家人食飯慶祝。（送個細佬或妹妹畀囝囝做生日禮物？）佢唔會悶，日日過得精彩過我，星期二至六都要學嘢，上英文、數學、畫畫、學琴，同埋佢最鍾意嘅跆拳道。我唔係怪獸家長，每日分配一小時畀佢上堂，唔會日日都係玩。」他自覺年紀不小，現時是事業搏殺期，和太太商量後，覺得不如集中火力培育囝囝，一個小朋友夠晒數。
郭珮文懶理Hater留言
對於Ben被網民指衰老，山聰說：「佢演大反派，唔係靚仔形象，我都喺《新聞女王》演過弱智爸爸，大家都係專業演出，所以唔擔心佢。」問到是否當了爸爸後容易疲憊？山聰指Ben在上海時好精神，又指Ben拍《反》劇時同時忙拍另一劇，希望為他平反。談到《新聞女王》將拍續集及電影版，山聰表示有機會也想和佘詩曼合作。
於節目中擔任「扮工室助理」的郭珮文表示喜歡Cosplay，但怕麻煩，以前萬聖節愛扮搞笑角色，後來則走性感路線：「因為只得呢一日性感唔會俾人鬧。」問到被誰罵？她指很多Hater會留言，已習慣不會回覆：「唔想令Hater覺得我俾啲留言刺激到。」
