馮盈盈低調迎30歲
馮盈盈昨日出席美食廣場活動時示範拉茶，似模似樣。下月30歲生日的她表示無意大事慶祝：「我想盡量低調，簡單細搞，同家人或者熟嘅朋友食飯慶祝，因為去到30歲生日想有啲特殊意義，留畀自己同家人。（你以前好重視儀式感？）有生日蛋糕就可以，同埋生日可以畀自己放縱食，我近期好勤力運動同食得好清淡。（踏入3字頭想搵好男人？）我未來兩年都唔拍拖，唔要男人。（戒色？）因為要專注工作，一日得24小時，好難感情同其他方面同步進行。」
提到盈盈早前拍節目《流行都市》時全程以淑女坐姿示人，遭主持林秀怡取笑及模仿，盈盈稱曾跟秀怡合作，大家相熟：「嗰刻唔覺得佢係嘲笑嘅意思，唔係大家咁諗，只係正常朋友咁傾偈。（你依家轉型？）我唔係刻意轉型，依家工作上自在同自信咗。初入行做綜藝節目好緊張，好想投入，會表現得活潑同熱鬧啲，依家想畀鬆弛嘅一面大家睇。」
