陳展鵬爭女 「隊冧」方力申
Keep住個樣 預備拍《逆天3》
無綫劇《逆天奇案2》前晚舉行宣傳活動 ，主角陳展鵬預告結局篇非常精彩，指方力申（小方）拋開偶像包袱，以前所未有的陰險形象示人！他笑言與小方於劇中是情敵，為了跟林夏薇復合，會盡快「隊冧」小方！
陳展鵬、馮盈盈、方力申（小方）與劉佩玥等前晚出席《逆天奇案2》的宣傳活動，唯獨未見女主角林夏薇現身。無綫製作部（戲劇合拍）總監暨劇集總監製劉家豪宣布好消息，《逆天2》連續3周黃金時段7天跨平台平均收視稱冠，台前幕後齊切燒豬及開香檳慶祝。
陳展鵬開心說：「未試過個個禮拜都冠軍，破咗自己紀錄，每周冠軍可以每次大家聚埋飯局。（驚食到肥？）我冇肥，要預備開《逆天奇案3》，第2集都係突然話開，所以要好好準備Keep住個樣。」他又指林夏薇去了很遠的地方學瑜伽，宣傳的責任交給他：「我哋係一對，我幫佢頂住冇詐型，我有時都會出席唔到，不過今次好齊人，下次慶功應該會仲多人。」
他透露結局篇劇情峰迴路轉，小方演反派更是前所未見：「我係睇小方啲戲、聽佢啲歌大，未見過佢做反派，但去到幾盡要先賣個關子，佢將成個香港反轉，睇吓我點收服佢啦。（你嘅感情線最終會點？）我梗係想同林夏薇復合，但有第三者小方，不過我會盡快『隊冧』呢個情敵。」提到他日前偕妻女自駕北上，被網民發現未有貼藍色禁區紙在車上疑違規，展鵬多謝網民提醒：「大家提醒得啱，一定要小心，但請放心，當時係停咗車未過關，我都係第一次揸車返港珠澳。」
馮盈盈想做打女
小方表示過去多演富二代和敗家仔角色，今次算是大突破，開心遇上好角色。提到他主演的電影《億計劃》近日於內地上映，首日票房僅得74元人民幣，上畫5天才破千元人民幣，他說：「其實電影喺2018年拍，好早已經喺戲院上映，加上網上同免費平台有得睇，依家再上，可能都有人鍾意入戲院感受氣氛。」他笑言要「搵食」，學周潤發所言什麼戲都接，只是外間誤會他不用「搵食」。
馮盈盈表示若再拍第三輯，想挑戰動作戲，不論打人或被打都想試：「雖然我未試過有啲驚，但如果有機會就去學功夫，我好恨做打女！」
