望實倫永亮 林憶蓮唱得安心
4年冇踏紅館超緊張
天后林憶蓮相隔4年再踏紅館，前晚偕好拍檔倫永亮（Anthony）等跟香港管弦樂團合作開騷。久未踏紅館的憶蓮被Anthony踢爆超級緊張！他指憶蓮要求一定要在站鋼琴旁唱歌，因為望着他才會覺得安心。
林憶蓮與好拍檔倫永亮自2004年後，相隔20年再度與樂團合作，兩人前晚開始為一連三場在紅館舉行的《港樂50·友弦樂聚》演出，其他參與歌手還有葉麗儀、陳潔靈、馮允謙、雲浩影、涂毓麟。葉麗儀和陳潔靈演唱重新編曲的《夢》、《星夜星塵》和《上海灘龍虎鬥》揭開序幕，之後年輕歌手輪住出場，涂毓麟自彈自唱《分分鐘需要你》，雲浩影唱《酷愛》，馮允謙則唱《命硬》和《給缺席的人唱首歌》。
憶蓮感觸 3度落淚
至於林憶蓮和Anthony出場演繹《早晨……》和《依然》，期間有觀眾送花，Anthony彎腰收花時笑言腰骨痛。之後他表示1988年跟憶蓮在紅館開騷，熒光幕即播出當時他們的青澀樣，二人互稱「林憶蓮妹妹」、「倫永亮弟弟」，憶蓮坦言好感動：「再講我想喊！」
二人均表示首次見對方印象不好，Anthony笑言：「第一次見憶蓮喺錄音室，佢包住頭巾、戴太陽眼鏡唔出聲，唔通佢啞？好驚，有啲巨星恐懼症。」憶蓮則笑言看電視時見Anthony參加歌唱比賽，對方的台風和歌藝令她震驚：「接受唔到即刻轉台，最後仲熄埋電視。但識咗之後發覺佢好可愛。」音樂會尾聲時，憶蓮唱已故填詞人林振強的作品時非常感觸，先後3度落淚。最後眾星合唱《千個太陽》，為音樂會首場畫上完美句號。
Anthony騷後受訪，他透露憶蓮要做新唱片，完騷後趕着去錄音。問到憶蓮重返紅館會否緊張？他說：「佢有少少緊張，因為4年冇唱，佢同我講死都要企喺琴邊，望住我就定啲。」記者笑他在台上發台瘟，忘記多謝憶蓮，他笑言：「好彩冇多謝佢，因為一講佢就喊，佢話唱《此情只待成追憶》望住我就喊，係咪我個樣有問題？」他覺得今次音樂會成就大家的集體回憶，若10年後搞，未必有此魄力：「同佢相識37年，識到呢個朋友一生無悔，好感性好照顧人，隔日就煲補氣湯我飲，但尋晚飲完眼光光好精神瞓唔到。」不過他自爆經常被憶蓮整蠱，試過入酒店房換走他的褲。
