小齊撐Gigi 係未來天后
不捨演唱會 3度落淚
一連三場《炎明熹Gi-FORCE演唱會2024》前晚舉行尾場，炎明熹（Gigi）邀得任賢齊（小齊）做嘉賓，小齊睇好Gigi做天后，叫大家給予多些機會對方。Gigi感激歌迷一直支持，更不捨得人生首個演唱會，於尾場演出3度落淚。
Gigi於演唱會尾場繼續又唱又跳，表現落力，不過卻發生了小插曲！當她完成空翻動作落地時，可能用力太猛，結果她被衞衣帽「兜頭笠」，見Gigi露出既尷尬又可愛的笑容，之後秒速整理衣服繼續跳唱，緩解這個蝦碌場面。
期間Gigi獻唱《星語心願》時表示小時候看電影《星願》，已很喜歡電影男主角任賢齊（小齊），隨後她唱《對面的女孩看過來》時，小齊驚喜現身合唱，掀起全晚高潮。小齊笑言女兒跟Gigi同年：「人多嘅時候叫我小齊哥，唔好叫Uncle呀！」Gigi送上繡有小齊名字的水樽：「我知你5月開巡唱，所以揀咗呢個識自己煲水嘅水樽，非常方便，我都繡咗你個名喺度。」小齊自嘲年輕時會喝凍飲：「之後漸漸用暖水壺，好多謝你。我真係成間公司都講，佢係未來嘅天后，希望大家都畀多啲機會Gigi。」
感觸爆喊 歌迷代唱
開騷前，大批歌迷要求Gigi唱新歌《還有一艘救生艙》，有求必應的她特意於補場送給歌迷，但卻一時感觸唱到喊，幾乎大半首歌要台下歌迷代唱。她說：「我覺得我又代入咗首歌裏面，但唔係愛情，今日係最後一場演唱會，即係今日係最後嘅一次，然後大家要遠離我嘅感覺。點解今晚先揀呢首歌嚟唱？因為我想送呢首歌畀補場嘅大家，但係我真係冇用，成首都唱唔到，要大家幫我，我下次會唱好佢㗎。」觀眾大叫「加油」為Gigi打氣。
Encore環節，Gigi特別選唱《你是你本身的傳奇》，指台下每位歌迷都是傳奇，一起成就她的歌手夢，並再一次落淚，不捨得這個人生首個演唱會舞台及觀眾。唱到演唱會最後一首歌《Only For Me》，Gigi叫大家高舉手機燈及合唱，望向這片燈海，她的淚水再一次掉下，令演唱會在淚水與不捨之情下，感動落幕。
