放生阿仙奴 拜仁好陰功
小童式手球 球證唔算數
歐聯大戰是小朋友玩泥沙？昨晨上演的兩場歐聯8強首回合賽事，最終都成為高水平的入球騷，贏盡球迷眼球與掌聲。然而在阿仙奴主場對拜仁慕尼黑之戰，球證尼貝治對「兵工廠」一次處理龍門球時犯下手球視若無睹，竟解釋為「只是小朋友式過錯」，強調不會為此判罰12碼，賽後隨即惹來拜仁上下狂轟，就連英格蘭名將里奧費迪南與基昂亦幫口狂插。拜仁今場痛失贏波良機，認真陰功！
在酋長球場之戰，布卡約沙卡開賽兩分鐘便為主隊阿仙奴先開紀錄，基拿比與哈利卡尼在上半場中段各入一球，助拜仁反先。後備登場的李安度杜沙特在下半場中段為主隊入波扳平，雙方終打和2:2，要留待次回合分勝負。不過，今場焦點是下半場當拜仁領先2:1之時，一次阿仙奴的龍門球，門將大衛拉耶在小禁區右邊放下皮球，用腳傳交予在小禁區左邊的加比爾馬加希斯，後者卻用手將皮球執起，此時球證尼貝治響起哨子，卻並非吹罰手球判12碼，而是提醒阿仙奴隊員再開龍門球，此舉自然惹來不滿，不論球場內外都有激烈討論。
拜仁前鋒哈利卡尼賽後說：「當球證吹雞，好明顯我哋應獲判12碼啦！守門員交波，加比爾用手執起個波，係我見過最清楚無誤嘅極刑。」隊友湯馬士梅拿補充：「個球證睇得好清楚，可能佢覺得判12碼好尷尬啦，但佢只需要執行球例就得。我諗球例唔會係話只要你冇心，就可以再開龍門球啩！」
至於拜仁主帥杜曹更加不滿：「全世界都知，球證犯大錯冇畀12碼。最令我嬲爆嘅係球證同我啲球員講，呢個係『細路仔過錯』，佢話唔會喺歐聯半準決賽咁樣判12碼。真係好恐怖嘅解釋，唔理係大人定細路犯錯，佢就係要判手球。最嬲係因為呢個重大決定影響我哋呀！」
基昂幫理不幫親：冇得拗啦
就連來自英格蘭的名將都「幫理不幫親」，里奧費迪南說：「難以置信，佢點可以吹完雞唔畀12碼！」身為阿仙奴名宿的基昂就說：「冇得拗啦，個球證真係少少搞唔掂呀！」
同晚另一場歐聯，皇馬主場與曼城打和3:3，翻查往績，兩隊歷來4次在淘汰賽相遇，皇馬主場兩次不勝曼城，最終都被淘汰，莫非「銀河艦隊」今次都是凶多吉少？
