失明人士雪君 看不見做得到
憑觸覺煮虹吸咖啡
弱勢的殘疾人士一向就業困難，原因是不少僱主對他們的工作能力存有誤解！先天性青光眼的廖德健（Ken）與後天失明的妻子程雪君，均是煮咖啡高手，尤其雪君單憑觸覺去烹調虹吸咖啡，證明失明人士雖然看不見，很多事情都做得到。
文、攝：記者 民章
「香港咖啡奶茶文化館」致力推廣咖啡及奶茶文化，亦創造平台給予視障咖啡師工作及培訓，《探索味之世界》是首個和視障咖啡師合作的項目，聖約翰座堂生命啟進中心則提供青年義工協助！活動有兩部分，分別是「美味Cafe」和「黑喑中的味之世界」，視障人士Ken會即場烹調美味咖啡，雪君則是「黑暗中的味之世界」導賞員，引領健視人士探索味之世界。
12歲視神經發炎 18歲失明
雪君是虹吸咖啡師，12歲時視神經發炎，引致視神經萎縮，至18歲完全看不見東西，「唔開心咗大約半年，因為乜都睇唔到，唔想外出。最後我唔想父母擔心，先決定面對、接受。之後去咗盲人輔導會，有專人教我哋學揸白杖、自己坐交通工具、安全煮食、電腦、點字等生活技能，令我哋有信心生活同工作。」
雪君感激義工陪伴跑步、踩單車，由於開始做到很多事情，她願意參加更多活動，例如學唱歌、鋼琴、編曲等，現在最愛是煮咖啡，「妹妹有飲咖啡習慣，佢每朝都飲，咁我又跟佢飲，邊飲邊思考自己點解唔開心，當飲完後發覺自己冇再唔開心，冇再諗歪，就鍾意咗飲咖啡。」雪君指茶餐廳的咖啡可能太高咖啡因，喝完後會不舒服，直至老公Ken學了手沖咖啡，她便一試愛上，「齋啡冇奶冇糖，老公每次上完堂都會沖一杯畀我飲，大家會一齊研究味道，後來我有機會學虹吸咖啡，最初都懷疑自己做唔做到，因為虹吸咖啡需要使用一個光波爐加熱，利用虹吸原理嚟煮咖啡，我心諗會唔會焫手？但接觸咗先發覺個諗法多餘，因為咖啡壺有一啲位置唔會太熱，接觸嗰個位可以感受啲水係咪升咗上嚟。雖然我睇唔到，但用手感受溫度，咁就知道水去到咩位置。依家我同老公喺屋企一得閒就會煮咖啡，一齊討論吓味道有咩進步空間，令我哋多咗話題，生活更多姿多彩。」
雪君指視障人士的工種狹窄，多做接線生或按摩技師，「之前我做過烘焙，主要整曲奇，同事會幫我磅好晒啲麵粉，然後我會將牛油、糖等分好次序，例如麵粉用大啲嘅盤，牛油就放前面，最左邊就放蛋，按自己嘅次序去整，但疫情後冇做，後來就學煮咖啡。視障人士難搵工，要搵到肯幫忙嘅僱主唔易。我鍾意煮嘢食同飲咖啡，咁啱都有僱主請，自己算係比較好彩。」
Ken應徵店務員遭歧視
Ken出世已有青光眼，只能直視，喪失了周邊視力，「其實我興趣同普通人一樣鍾意打機、睇波，人哋遠啲睇（波），咁我咪近啲睇囉，如果去球場就用望遠鏡。我依家做program worker（活動工作員），我性格貪玩，呢份工可以接觸唔同事物，好啱我。至於嚟呢度沖咖啡都好開心，一來我鍾意飲咖啡，二來唔同人有唔同口味，例如有人鍾意甜，有人鍾意酸，沖出唔同口味，令自己技術更穩定。」
Ken透露多年前在勞工處找工作，獲介紹應徵店務員，「當時係叫我去試工，我一去到，老闆問我睇唔睇到個貨架，我話睇到，跟住佢再問我睇唔睇到價錢，我就話睇唔到，咁佢即刻話我唔適合做。其實我雖然睇唔到價錢，但我認得件貨，例如可樂呢啲一睇顏色、形狀都會知，我只要記住個價錢咪得囉！最初講明係試工，但佢試都唔畀機會我試，根本冇諗過請我！」
