黃劍文冇獎零失望 想唱而優則演
譚輝智搞笑擔當 封「中2舞台王者」
《中年好聲音2》前晚順利選出冠亞季軍，分別由古淖文、譚輝智及顏米羔奪得。賽前大熱的譚輝智屈居亞軍，承認任性選唱《記憶棉》，但獲古淖文及顏米羔封為「中2舞台王者」，指他平時為人相當搞笑。另一大熱黃劍文表示已盡最大努力，對賽果不感失望，並笑言有機會想演戲。
《中年2》前晚進行決賽，最終由古淖文、譚輝智及顏米羔分別奪冠亞季軍。賽後他們一齊受訪，提到古淖文表演最後一首歌《Feeling Good》獲6位評判一致畀滿分，他說：「睇到分數有抖唔到氣嘅感覺，諗都諗唔到！」完騷後未見家人上台與他合照，古淖文解釋：「賽前父母有問我介唔介意佢哋唔到場，我唔介意，因為唔想佢哋舟車勞頓，又怕我冇時間照顧佢哋，寧願佢哋喺屋企舒舒服服睇電視。」
譚輝智於「自選必殺歌」環節被評審指揀錯歌，他坦言不介意：「我一直唔覺得自己係大熱，一開始我睇好古淖文、顏米羔。揀《記憶棉》嚟唱一定係錯，但我想任性少少，唱自己鍾意嘅歌。」提到快歌環節，譚輝智唱《屈到病》贏得全場喝彩，他笑言：「喺屋企練習嗰陣，當音樂響起，我都未唱，小朋友已經笑到碌地，所以決定唱呢首歌。」雖然輸掉冠軍，但譚輝智獲「觀眾最愛好聲音大獎」，他謙稱自己從來不是受歡迎的人，古淖文及顏米羔即封他為「中2舞台王者」，並指譚輝智平時很搞笑。只得季軍的顏米羔滿意成績，認為唱得爽和站在舞台上就足夠。
安雅希最想得到觀眾認同
賽前被看好入三甲的黃劍文與安雅希都不覺失望，黃劍文稱獲家人認同已當贏：「其實好開心，因為我把聲病咗一個月，睇過好多中醫、針灸等方法，又戒口但都冇改善，我已經盡咗最大努力。」提到他獲台灣歌手張芸京飛來港支持，黃劍文說：「之前佢有一段時間迷失，我特登飛去台灣陪佢傾通宵，今次佢又飛嚟支持我，我覺得好感動。」之前因減肥過度影響表現的安雅希，表示賽後會循序漸進式減肥，不再急功近利。問二人會否入行？黃劍文坦言想拍戲，因為演戲對唱歌有幫助；安雅希則稱最想得到觀眾認同，笑稱想先做歌手：「都係唔敢講，做歌星太遙遠嘅事。」
