讚家樂變「父」心漢 連詩雅：佢好Man
悉心打扮零孕味
懷孕逾5個月的連詩雅（Shiga）昨日出席復活節活動，穿露背連身裙的她身形依然纖瘦，加上穿兩吋半高踭鞋仍步履輕盈，絕不似大肚婆。Shiga直言希望老公陳家樂能見證BB出世，並讚老公變Man，是「體貼奶爸」。
連詩雅穿搭成功遮掩微隆的肚皮，毫無孕味，她笑言每次出席活動前都精心挑選服飾，又指老公陳家樂不理解她為何要遮肚：「盡量我都想收埋個肚一陣，私下我其實會着貼身衫，坐公共交通時唔想企，會揭開個肚希望有人讓座，坐的士會叫司機開慢啲。」
Shiga笑言最初驗身3次時，老公都感動到喊，最近一次為BB進行結構檢查時，老公終於沒喊，不過大家心情依然緊張：「因為睇到BB嘅心肝脾肺腎、手指腳趾有冇缺陷，當時我大力捉實老公，感覺佢都好用力。」她又指近期BB頻頻踢其肚皮，每日最少踢8次，最活躍時間是下午到晚上。記者指可能佗男B特別百厭，Shiga醒目沒露口風，因暫時不想透露BB性別，不過老公鍾愛的球隊最近贏波，睇波時他激動大嗌，BB即有反應踢她的肚皮：「我唱歌時BB都一樣有反應，但到我上台佢又好乖唔踢我。」
着高踭鞋要老公「鑒定」
Shiga公開放閃，笑言看到老公成長的一面：「我眼中嘅佢童顏、大細路，依家變得好Man、好緊張我，變成一個爸爸喇，我都好開心！」她笑指現在每次出街都要「講數」，家樂會提她不要穿太高的高踭鞋，又指孕婦不要着得太性感，故昨日她穿高踭鞋都要經老公「鑒定」。
之前家樂表示太太預產期時要離港拍戲，未必能陪入產房，Shiga直言：「生第一胎好想老公見證BB出世，最初好擔心，因為會影響順產定係開刀嘅決定，所以考慮遷就佢工作，不如喺外地生啦，但老公都希望盡量趕返嚟，除非BB早出世。（家樂話想入產房拍片，不過會尊重你意願。）最好就由個頭嗰邊影過去，唔好影到下體，自己睇到都驚！但其實冇所謂，最緊要有佢陪住我。」
