同陳自瑤最夾 羅子溢冀再演CP
有望爭視帝 陪跑都開心
無綫熱播劇《婚後事》今日進入結局周，一眾演員昨日出席活動時落力宣傳，盼收視再升。主角羅子溢與陳自瑤（Yoyo）均被讚演技升呢，有機會爭視帝視后，子溢開心表示入行多年終獲認可，又指最佳拍檔非Yoyo莫屬，希望有機會再跟她演情侶，擦出更多火花！
羅子溢、陳自瑤、黎諾懿、賴慰玲與王敏奕等昨日出席無綫劇《婚後事》宣傳活動，提到劇集進入結局周，眾人大表不捨。子溢笑言：「有Yoyo陪我呢20集，如果可以再同佢演情侶就好，你話你喺公司入面同邊個拍檔最有火花？」Yoyo識做說：「羅子溢囉！」子溢說：「我哋由14年前喺《缺宅男女》合作，咁多年尋尋覓覓，估唔到最合拍CP係Yoyo。」
提到Yoyo在劇中性感跳舞及在泳池仰天一幕，身材突出成為網民熱話，她表示：「我花咗幾日排舞，但正式拍攝場地改咗喺屋企，環境唔同晒，有走廊位又有傢俬，所以拍攝前2、3個鐘跟跳舞老師學，我出盡力去記、去跳，所以好難忘。至於泳池戲，我拍完冇睇Playback，亦唔知導演會用嗰段，我睇到個效果都有少少嚇親。」子溢即說：「你係（豐胸）代言人。」Yoyo笑言：「你個胸仲大過我啦！」
子溢在醫院面對老父離世的一幕被網民讚演技大爆發，很大機會提名爭視帝，他謙稱公司有很多好演員如陳豪和黎耀祥：「我有機會陪跑已經好開心，入行咁多年首次聽到咁多人認可，已經係最大得着。」
王敏奕減肥有壓力
穿平底鞋的賴慰玲被問是否懷孕？她笑言：「唔係，係造型師幫我襯，佢話呢對鞋最襯套衫。」她笑言將會「弱勢回歸」，跟劇中妹妹王敏奕修補關係。獲網民讚是「最靚小三」的王敏奕表示：「其實拍醜咗，拍嗰陣肥啲同大隻啲，監製要求我減肥，但每次監製要求，我就會好大壓力，反而減唔到，但出來效果都OK。」談到人氣劇《新聞女王》會拍續集，她坦言有份參演，並已聽過故事大綱：「係好有發揮，所以好期待。」
