撤辣前零成交屬正常
湯文亮博士 紀惠集團行政總裁
在春節過後，有睇淡樓市KOL知道香港藍籌屋苑二手樓竟然零成交，非常雀躍，認為香港樓市已死。KOL可能未去過崇光買嘢，崇光每年都會慶祝春秋二祭大減價，在大減價之前，除了一些必需品，其他貨品都滯銷，尤其是奢侈品，因為大家都會等大減價才買，隨時會慳兩三成。
雖然辣招稅已經減半，但現在非香港人買樓仍然要畀15%，大多數人估計在今次財政預算案，財爺就會宣布撤辣，否則，冇人買樓，地產商就唔會買地，明年財赤比今年更犀利，撤辣是唯一選擇，那些要畀辣招稅如果現在買樓，到財爺宣布撤辣，就算唔俾人笑到面黃，自己都抌心抌肺。
買賣意慾不強
在大減價之前有人用正價買貨品，百貨公司唔會唔接受，甚至會好開心，但業主唔同，知道如果撤辣之後，那些打算買樓而又要畀辣招稅的人出價就會勇一些，所以，亦不急於現在賣樓，否則有可能今日市價變成明日賤價，既然買賣雙方現在的買賣意慾不強，零成交反而是正常的。
講開又講，有同事話有晚與一班朋友食飯，講到撤辣問題，其中一個反應激烈，認為政府撤辣會增長炒風，並且鬧支持撤辣的人是既得利益者。有朋友想起，那個反對撤辣的人在較早前將自住單位賣走，仍未完成交易，如果財爺今日宣布撤辣，樓價有機會掉頭回升，那人在從未贏過之下變成一個大輸家，所以，他不得不大力反對撤辣，原來，那人才是炒家。
