吳浩康自資出歌 約定紅館見
開完騷繼續做地盤 目標升職
吳浩康（Deep）近年轉行加入建築業，不過未有放棄音樂，相隔5年、在前晚再開騷，更稱自資出新歌，與粉絲約定下一站紅館見。曾為中環海濱戶外演唱會搭建場地的他，坦言想過有天可以自己舞台自己搭建。
吳浩康前晚舉行《Deep Reborn》戶外演唱會，招待1,200位樂迷，太太郭思琳偕兒子到場支持，吸引周國豐、伍仲衡與莊韻澄等捧場。Deep甫出場跟大家講恭喜發財，還笑言趕在元宵佳節開騷是可以逗利是。表演中段，他落台與歌迷近距離接觸，令他圓夢狂收利是。
闊別5年再開騷，Deep坦言有點感觸，感謝前公司英皇，特別是老闆楊受成和經理人霍汶希照顧他的的廿載恩情。他自認是「麻煩友」難以相處，就連自己事業也賠上。之後他轉行做地盤工人，沒想到被外國傳媒採訪，經歷高低起跌可以大聲說：「我冇死到！」Deep坦言開騷前被很多人問做地盤是否為了這次演唱會鋪路，最初他會答「唔係」，現在會借用王家衛的一句：「你睇到乜就係乜。」Encore時，他唱完《兒戲》後，借助觀眾掌聲多謝父親：「老竇，你個仔要衰過先有呢種味道唱到呢首歌，呢啲係命水！但你個孫就唔會唱到，因為佢乖過我好多，細細個就好生性，如果有個我咁嘅仔就真係慘，所以辛苦晒你！」
冇買小童耳罩 唔畀囝囝上台
Deep完騷後受訪，問到為何不讓妻兒上台？他指太太自生完BB後皮膚欠佳，以及覺得未準備好，兒子則因來不及買小童耳罩、擔心台上聲浪太大令耳朵受損。提到他完場前相約歌迷下一站紅館見，他坦言紅館是終極目標：「如果再開騷要做多啲新歌，原本諗住新年做新歌，但全家病晒。（自資做歌應付到？）仲頂得住，但亦需要喺地盤工作，特別經歷疫情後，發現有多一門專業領域，工作上可以對沖風險。依家喺地盤做搭鐵架工作，冇諗過幫到自己克服畏高，不過次次落手做真係有啲攰，希望盡快升職，畢竟人望高處。」他透露曾在中環海濱搭建舞台，問到可想親手搭建自己的舞台？他坦言：「我搭建嗰陣真係有諗過，但又覺得自己好市儈，呢啲錢都想慳！」
Deep有邀請地盤工友睇騷，不過未能實現兄弟的願望：「佢哋點唱《到底發生過什麼事》，如果唱佢哋嘅心水，就要成Part改歌，會加重隊Band嘅負擔，所以唯有下次先。」
