千嬅經歷高山低谷 提升能量自救
「入五」開生日P真情剖白
楊千嬅前日50歲生日，選擇跟歌迷一起度過，舉辦近千人的《MEET YOU AT THE HALFWAY MINI CONCERT生日限定》派對，除了選唱多首平日少唱的歌，亦分享這幾年的心路歷程，用作鼓勵所有愛她的人，真情流露對話感動全場！
由於早前不少歌迷提出要求跟楊千嬅慶生，故她在短時間內籌備是次生日會，她在台上說：「呢段咁長人生路程，回頭望係非常精彩，亦從冇遺憾。」並獻唱《火鳥》、《直覺》、《孔雀》等歌曲，她說：「今日大家陪我『入五』，我希望用一啲平日冇唱、少唱嘅歌送畀你哋。」繼而再唱《偷生》、《嬅麗緣》、《我是羊》等，之後又跟歌迷傾偈，她坦言這幾年經歷了高山低谷，遇上不少考驗：「新時代網絡風暴係一個好震撼嘅經歷，我乜都遇過晒， 幾十歲人我同自己講有咩未見過？ 真係低處未算低。當我經過呢段日子，發覺自己好強大，今日好感恩，上天畀我有力氣時經歷呢個浩瀚人生。」
「唔好鬧埋我啲朋友」
她分享於低潮的情緒問題：「尤其見到自己啲CD碎到一地都係，個心好痛！我連朋友都唔敢再關注，你鬧我冇問題，但唔好鬧埋我啲朋友，諗住一個人撐唔好害人。曾經我覺得好恐怖，所以首先選擇熄機，唔好睇唔好理，休息啦。我點企得番起身？好多人PM我，畀好多鼓勵我，其中有一個歌迷將我多年來上台講嘅得獎感受，剪咗幾分鐘片畀我，好似成3分幾鐘，我一路睇一路喊， 原來我同人講過嘅嘢曾經幫到人，最後幫番我自己。我發現困難時只有係自己救自己，唔好放棄自己。」其真情對話除了搞喊自己，亦感動不少粉絲落淚。
千嬅寄語大家愛錫自己，遇上難關時要提升自己的能量：「呢個係『千嬅群英會』嘅精神，我50歲都做到，你哋咁後生，可以活得更精彩……大家聽住我嘅歌，就可以似我保養得咁好。」全場歡呼拍掌，不過千嬅笑言：「我唔係話保養個樣，係話個腦呀。」笑爆全場。活動完結，歌迷仍不願離去嗌Encore，千嬅跑出來說：「真係唔可以留喇，個場10點閂門，我生日剩番兩個鐘，你哋畀我同屋企人、朋友過啦。」歌迷才不捨離開。
