11連勝夠霸氣 日本上盤「伊」絲執
亞洲盃奪標大熱日本在D組首輪有驚無險反勝越南4:2後，各項賽事已經寫下11連勝佳績，近4戰更勁入20球之多。吸收過首戰小驚嚇之後，實力超班的「藍武士」今晚會迎戰同在首輪贏波的伊拉克，憑超班實力及超強氣勢，可望大炒一場向出線進發，日本讓球半/兩球，都照捧上盤。（HOY TV 76台周五7:30am直播）
今屆賽事世界排名最高的日本，近年實力進步之大有目共睹，在近11連勝之中，包括曾打敗了德國、土耳其與突尼斯等具實力球隊。當然，上場日本曾一度被越南反超2:1，可幸球員之後仍冷靜應對，完成反勝，吸收教訓之後，今場必會打醒精神作戰。人腳方面，有傳主力翼鋒三笘薰或有望回歸，但應會先任後備，上場梅開二度的南野拓實仍會擔正掛帥，創造力強的久保建英則有望輪換作正選，實力確實超班。
對手伊拉克上場以3:1輕勝印尼，大軍整體實力普通，最具名氣是曼聯出身的施丹伊巴爾，考慮到雙方近6次交手，伊拉克是1和5負，今場面對來勢洶洶的日本，根本無力招架。
