水晶宮嗒得落拖肥
老帥鶴臣獲派定心丸
英格蘭足總盃第3圈今晚先演獨腳戲，水晶宮主場迎戰愛華頓。兩軍曾在11月英超碰頭，水晶宮主場輸過2:3，不過今晚再度碰頭，雙方狀態已此消彼長。水晶宮上輪英超主場精彩反勝賓福特，取得埋年完美勝利，相反「拖肥糖」英超3連敗疲態畢露。水晶宮今晚主場有力復仇，平手盤撐主隊。（myTV Super App周五4:00am直播）
兩軍上屆英足盃同於第3圈出局，原本今屆對這項盃賽亦未抱太大期望，雙方心態上都以護級為主，盃賽隨遇而安。水晶宮經過早前英超8輪不勝後，上輪反彈即獲高層派定心丸，除保證老帥鶴臣可以執教到季尾約滿外，亦答允在一月轉會窗增兵救亡。球隊目前士氣大振，加上踢完今仗將迎來兩周休戰期，直至本月20日才在英超倫敦打吡作客阿仙奴，今晚沒有留力需要，自然希望在2024新年第一場主場比賽打響頭炮。球隊前季於8強戰主場大炒愛華頓4:0殺入4強，今仗有足夠信心重溫舊夢。
愛華頓今季因違反公平財政條例被扣10分，已經注定要為護級而戰，早前曾大踢爭氣波打出一段4連勝。可惜在上月20日英聯盃主場互射12碼不敵富咸後打窒道氣，之後在英超連輸3場，當中作客1:2負熱刺及主場1:3負曼城，都踢出強橫鬥志，力拚而敗只因對手太強，但亦因為拚搏過度令元氣大傷，上輪作客對狼隊演出嚴重走樣，慘吞3蛋之餘，眾將都攰到舉步維艱。
愛華頓疲兵難兼顧盃賽
愛華頓目前在英超淪落17位，只比降級區尾3的盧頓多一分但多賽一場，除護級外已沒有資本考慮其他，連場拚搏未能得分士氣受挫，已到回氣時候。「拖肥糖」多年來英足盃一直遇上宿命，近12次在倫敦出戰的這項盃賽未嘗一勝，今晚作客隨時會派大量副選落場，爭勝意慾在水晶宮之下。
