換樓應該先買後賣

香港仔 P12 2023-07-25

　　湯文亮博士紀惠集團行政總裁

　　政府在7月7日宣布放寬樓按成數，其中價值1,500萬元以上至3,000萬元的住宅物業最高按揭成數上調至六成，這對於打算換樓的人來說是一個非常好消息，但老實說，如果唔係買慣樓，到換樓的時候真係會膽顫心驚，如果先買後賣，代表有一段時間揸住兩個單位，代表欠債數字大增，未必每一個人都可以頂得住，但如果先賣後買，隨時變成賣咗買唔返，過往有不少業主先賣後買，到現在仍然要租樓住。

　　有年輕朋友知道我換樓有多少經驗，由1,100平方呎單位，換吓換吓，變成現在5,500平方呎，問我有什麼秘訣，究竟是先買後賣，抑或先賣後買，我話如果先賣後買，現在可能住緊幾百平方呎單位。當打算換樓的時候，如果遇到適合單位，就唔好左諗右諗，大膽畀一個合理的價錢，更大膽可以鋤吓價，如果可以的話，要求一個較長成交期，如果業主需要一些時間搬屋或者移民，可以考慮買入之後租返比業主一段時間，有了這個條件，買到的機會又會大一些。

　　買到樓要立刻賣樓

　　當買到樓之後，就要立刻賣樓，否則就算有錢成交都要繳付15%特別印花稅，千祈唔好以為有成年時間，慢慢賣都唔緊要，我見過有人因為過了期而要繳付以新樓價15%計算特別印花稅，如果以舊樓價計算，可能是25%，倒不如減多少價，益吓那個買樓的人，好過益政府，我是經驗之談，我已經換過幾次樓。