【資料速遞】一定美麗戰意無限
禁忌呢回事，每人標準各有不同，尤其白事，根據歷年來所見，好多有馬出都會打退堂鼓，但照跑亦唔算出奇；印象最深係，昔日馬王「包裝之星」暮年時，馬主馮生過身不久，練馬師羅國洲覺得既然有好狀態，如果贏到，馮先生在天之靈一定感到安慰，於是極力游說，結果「包裝之星」真係贏，又好似早幾年「喜蓮獎星」出戰一級賽前夕，「喜蓮」系有人過身，大摩費盡唇舌，最終力鬥下險勝，但就只派好友代為領獎。大馬主何壽南先生上月中仙遊，上次佢「一定讚」與合夥馬「一定美麗」照跑獲一冠一亞，肯定係家人考慮到南哥鍾意跑馬，投其所好係最佳做法，今次「一定美麗」再贏多場就更圓滿！
