環保兵團/貓哥出錢出力 自組清潔隊 上山下海 執靚香港
疫情下，當你行上山唞啖氣時，他們卻在山上執得身水身汗。
不是執金，也不是執寶，他們默默地通山執垃圾。
「周圍都係垃圾，咁我咪去執囉！」帶隊的「垃圾佬」說。
他們有個名堂，叫「上山下海執垃圾」團隊。
他們有個使命：執番靚山頭，執番靚香港。
他們在網上自發組隊，三四個一組，每星期起碼執三次。
他們是環保戰士義務執垃圾，已經執了兩年，合共出動超過一千次，收集了逾萬袋垃圾。
他們的發起人，是個兩年幾前才退休的救護員，以前救人，現在救港。
人人都叫他做貓哥！
風災之後……
群組號召 一周執三次
冼力求，人稱貓哥，自小熱愛戶外運動。
「我細細個就周圍玩，曬到黑晒，露營、獨木舟、行山，乜都鍾意玩。前幾年，天鴿吹完香港，嘩，周圍都係垃圾，咁我咪去執囉！」貓哥說的「天鴿」，在二○一七年八月橫掃珠江口，香港掛起十號風球，港、澳和珠海都有風災。
災後，貓哥和行山友一起上山下海清理垃圾，居然「執上癮」。「我（退休前）做救護員，以前係兩柴，救護車主管。我五十五歲退休，生日前一日就係最後一日上班。退休嗰日，即係我生日，四月二十六日，我就開咗個Facebook，叫人一齊執垃圾。」
開開心心執 執完抬落山
執垃圾也不是一件易事，貓哥說，到偏遠地方執，要扒獨木舟入去，用獨木舟載走，「真係，多一隻獨木舟，就可以執多啲垃圾。要人多先至得。」在朋友鼓勵下，他開設Facebook群組「上山下海執垃圾 GoGo Clean Up」，呼籲熱心人加入一齊執。結果，他們組織起一支清潔生力軍。
每次執垃圾前，大隊可有定下指標？「無呀！大家開開心心執垃圾，你執一個膠樽又係執，執一大包又係執。唔緊要嘅，即係你執走一個樽，環境就少咗一件垃圾，係咪吖？」沒有壓力，沒有指標，貓哥執得暢快。
目前「上山下海」群組的成員，每周至少三次出動，執靚香港郊野。
雖說沒有壓力，卻不是沒有困難。「走上山頭野嶺已不容易，垃圾又多又大件又重，執完要帶落山，難上加難！」
唔係玩玩吓！
不求回報 不怨垃圾蟲
二○一八年四月二十六日，是貓哥生日，亦是「上山下海執垃圾GoGo Clean Up」群組誕生的大日子。群組一開，不斷有人加入，現時已有大約四千名成員。群組人多勢眾，管理員亦由貓哥獨力頂住，發展到今日三十人擔當，「起初得我一個帶隊，家陣唔少管理員都能夠帶隊。」貓哥說。
唯一計算 執了多少袋？
香港人，什麼都要計算，讀書要「睇成績」，投資要「求回報」，拍拖要「搵筍盤」。貓哥執垃圾兩年幾，從不求回報。
「好多人好冇公德心，繼續在郊野亂掉垃圾，但係我哋唔會計較呢啲。」
「要計，不如計下今日執咗幾多袋垃圾仲好！」
「我以前份工係要睇車，每次都要將數據入Excel，出報告同計數。我而家都要計數呀，每次出隊都影相，計返執咗幾多袋，即係香港郊外少咗幾多袋垃圾。」
「唔好怪責人丟垃圾，你咁諗，就永遠唔會做，只去怪責人。」
「我哋執得一袋得一袋，唔好諗咁多，諗得嚟都執多袋，環境就乾淨咗。」
健碩的貓哥也有大男人細心一面。跟着貓哥帶隊到石澳執垃圾，他建議隊員執簡單的垃圾，例如石縫間的膠水樽等，他自己就處理舊魚網，因為舊魚網通常又大又重，更有很多魚鈎，多得肉眼也難以看到。「啲手指拮到損晒喇，埋返口又再損，真係唔覺意就中，中咗又好痕。」他擔心隊員受傷。
石澳之外，群組還在華貴海旁、屯門、西貢大頭洲、荃灣城門水塘、龍脊山徑留下足印，實實在在上山下海，執靚香港。
買定水果 執完好分享
沒有經費，他們只會用最簡單的工具「開工」，用食物夾夾走石縫中的垃圾，用剪刀和小鋸將魚網「斬件」。「我得退休金，唔係好多，海邊多鹹氣，電動工具好快壞。我哋成日出隊，唔會有錢買。」貓哥雖然夠鐘退了休，但仍未夠六十五歲，去「開工」都要支付全額車費，也是一種負擔。不過他卻不會死慳，每次出動都會買些水果與隊友分享，「錢唔多，都係大家開心吓，有啲水分甜甜哋。」
救護員出身的冼力求，「我唔想退休後，日日唔知做乜咁，執吓垃圾，起碼其他人嚟玩，影相靚啲，玩得開心啲。」這正是他能夠堅持的動力。
平平安安收隊
開枝散葉 一直執下去
「疫情將我哋打散，都好呀，而家唔止我一個帶隊，周末可以同時分為三、四隊。」「上山下海執垃圾」團隊已逐漸上軌道，參加者愈來愈多，貓哥卻說不想停下來，希望能夠繼續開枝散葉。
「我希望，當我將來死咗，佢哋都繼續帶隊執垃圾。我實會死，但精神唔好死。」他堅定地說，不似說笑。
安全第一 不想有人受傷
團隊目前只以Facebook群組組織，不容易收捐款，有隊友提議申請成為慈善組織。不過，申請做慈善機構就要製備文件，貓哥正與Facebook管理員商量，如何平衡實務工作及兼顧行政工作。
貓哥又特別注重安全，「我以前做救護嘅，所以一定唔想有人受傷。我成日話，慢慢嚟，要小心，唔好受傷，特別係（小心）啲魚網，有好多魚鈎。」所以，無論是否由他帶隊，他都希望人人平平安安收隊。
「唔使急呀！你睇吓啲浪，啲垃圾又排住隊到。」這是貓哥執垃圾時，最常掛在口邊的話。
下次當你郊遊時，讚嘆大自然的美麗時，還要感謝貓哥和隊員，上山下海執靚香港。
