【滎心一言】天下寵兒包廂好跑
丘嘉滎
剛戰全泥夜宴雖然唔係連場爆冷，不過跑道偏差嚴重，貼欄非常着數，難得金誠剛隻隻都走食生位，全晚三出三捷做埋騎師王，仲要好多馬匹開齋，可能嚟到季中馬匹體力開始下降，練馬師有心部署之下，排好檔有好形勢容易發揮嘅馬匹排住隊等交代，今期出爭第三場的「天下寵兒」形勢大好。
季初「天下寵兒」韁口唔好望空容易搶口，前仗排外檔改跑法留到最後，拍住「閃光燈」一齊衝近入Q，上場排中檔早段跟前守黃金包廂，入直路諗住開齋，點知遇上縮程賺級數嘅「極速贏」，但完成時間偏快水準不俗，今次「天下寵兒」排1檔，同場預計初出嘅「嘉應駿昇」同埋「寶進」會放頭，跑法彈性嘅「天下寵兒」照計可以再次守黃金包廂位，只要田泰安攞位順利應該可以補中！
