楊茜堯着重方便 為仔女搬竇
否認住「帝王屋」旺老公做視帝
楊茜堯與老公羅子溢最近被傳搬入「帝王屋」，因風水好可旺老公做視帝！楊茜堯昨日出席劇集宣傳活動時否認傳聞，強調搬屋只為了方便小朋友上學。至於林夏薇忙拍劇及做生意，故與老公仍未有計劃生小朋友。
楊茜堯、林夏薇（薇薇）、王浩信與楊明等昨日出席台慶劇《黑色月光》宣傳活動，男主角王浩信難得現身，但活動後要趕往電台錄節目，未有受訪便離開。對於劇集快將結局，楊茜堯笑言感到開心：「呢套劇收穫好多，有好多回響同多咗工作。」問到會否學黎耀祥一年只拍一劇？她說：「一年一劇好OK，因為我要好多時間照顧小朋友，有合適劇本都想拍，但要湊小朋友返學，我都好頭痛。（交畀老公湊？）佢都要開工。」
她笑言將小朋友交給好友楊明照顧，楊明說：「我一年唔止一套劇，我一年十套劇，我要搵食。」楊茜堯笑言：「你可以乘機湊小朋友，為將來做父母取經。」楊明笑言：「你叫Lisa（女友莊思明）取經，我問子溢取經點Hea太太。」問到兩人會否再合作？楊茜堯取笑楊明：「佢一年拍十套劇唔知有冇時間，我要打畀Lisa問，佢係你女友定老婆？」楊明說：「遲啲話你知。」楊茜堯追問：「你結咗婚未？」楊明沒好氣說：「你手指拗出唔拗入！」
近日有傳楊堯茜與老公為風水而搬屋，她表示：「太誇張喇！我哋搬咗年幾，話我哋住帝王屋，太睇得起我哋，亦太睇低有錢人。我哋搬屋主要係方便小朋友返學，同埋最緊要入到間屋覺得舒服，同地段合適，冇睇風水呢啲嘢。」提到王浩信少在香港宣傳劇集，她說：「佢啱啱有新公司，佢都忙，佢負責喺內地宣傳，我哋就喺香港宣傳。」
林夏薇冇時間生B
至於薇薇於劇中的衣着打扮成為網民熱話，她坦言沒想過憑角色而被大家留意打扮及自家鑽飾品牌：「我個實體店下月開張，內地同海外加盟店就傾緊。」結婚多年的她被問何時生B？她坦言要兼顧拍劇及做生意，還要照顧家中狗狗，難以分身：「我嘅新鑽飾品牌就係BB，依家做好眼前嘅事。（同老公有共識？）我哋冇任何計劃，總之依家宣傳完劇集就做舖頭開張，再忙加盟店。」問到有否想過雪卵？她坦言：「冇特別諗。」
