感激阿姐栽培 「教主」跪地合唱
天后加持紅館騷尾場
一連兩場「阿姐·汪明荃演唱會 2024」尾場前晚於紅館圓滿結束，邀得楊千嬅、容祖兒與「教主」盧瀚霆（Anson Lo）擔任嘉賓。千嬅與祖兒雖已貴為天后，但仍不忘汪明荃（阿姐）多年前的提攜。至於Anson Lo大讚阿姐是他人生路上很重要的老師，合唱《迷人 Pink Lady》時更單膝下跪以示敬意。
阿姐唱畢《傾城之戀》後介紹千嬅出場：「原來佢本來有演唱會係同我演唱會嘅日期非常近，但佢專登調動檔期去配合我，所以我真係好多謝佢，我哋多謝楊千嬅！」阿姐透露二十多年前曾擔任千嬅的演唱會嘉賓，千嬅說：「去到開騷時，我把聲好唔舒服沙咗，但係阿姐嚟到真係好冷靜，佢話千嬅唔緊要啦，叫我坐埋一邊，佢唱畀我聽。」阿姐說：「但係當時你唔知我唱咩歌。」
千嬅讚阿姐有義氣
千嬅說：「因為當時阿姐瞞住我，同編呢首歌嘅鋼琴老師秘密練咗兩星期，又叫我嘅造型師做咗一套衫，去配合我嗰Part演出，我好感動！阿姐畀我嘅印象就係好有義氣，同埋好大愛……感謝你畀呢個機會我，等我可以返紅館同大家演出，多謝！」說畢兩人便合唱《少女的祈禱》。
當阿姐唱《問我》，容祖兒突然現身台上合唱，阿姐透露大家相識經過：「其實我哋用同一個髮型師，嗰陣祖兒好細個，佢嚟到我面前同我講『我叫容祖兒，我係羅記羅文嘅學生』，好有禮貌。嗰陣開始錄唱片未？」祖兒說：「嗰陣我驚你唔識我，應該係啱啱開始錄咗一首歌。」阿姐說：「依家已經係天后級，你嘅努力大家睇到。」之後兩人合唱《我的驕傲》。
輪到Anson Lo出場，音樂即響起阿姐與鄭少秋合唱的《紫釵恨》前奏，阿姐即說：「吓！唱鄭少秋嘅歌？」兩人合唱後，阿姐坦言與Anson Lo不熟，Anson Lo說：「但係每年我哋起碼都會見一次，就係拜年嘅時候，咁就同你拜過幾次年。」接着兩人合唱《迷人 Pink Lady》，期間Anson Lo突然單膝下跪兼伸手拖阿姐，引發全場尖叫。之後阿姐落台換衫，Anson Lo說感謝阿姐與羅家英樂於栽培後輩，是他路上很最要的老師。
演唱會結束前，阿姐說：「喺度要多謝你哋嘅支持，陪住我一直行呢條娛樂之路，同我一齊享受呢個美麗嘅世界。」最後以《Make my day》為一連兩晚紅館騷畫上完美句號。
