朱晨麗開擇偶條件 優先考慮有車階級
朱晨麗昨日出席新車發布會，她表示首次參與有關汽車的活動：「見到啲車好靚又舒適，令我有衝動去考車牌。（你搵番個『柴可夫』男友，咁就唔使考車牌囉！）我都想，到時可以介紹佢買呢款車接載我，但最重要係佢孝順同心地好，不過有車牌可優先考慮。」
朱朱透露最近休假中，正等待公司安排新工作，計劃去泰國旅行：「我每年都去幾次泰國，因為平靚正，特別鍾意去按摩消除疲勞。最近我都喺香港按摩，師傅話我濕氣重。」她自爆想過開按摩店，但首先要物色一班好技師：「冇理由我落手落腳做，不過以前我跳芭蕾舞，都算半個運動員，經常有運動按摩師幫我紓緩疲勞，我從中偷師，所以我按摩手勢都幾好㗎。」
