湊完仔女趕開工 余香凝自然瘦
遲來的慶功 拉隊赴泰鬆一鬆
榮升金像影后的余香凝自從4月得獎後，忙得不可開交，直至上月才有時間跟家人和工作人員到泰國旅行放鬆兼慶功。她透露近期子女開學，每日送完他們上學便要去開工，雖然辛苦，但笑言不用做運動也會自然瘦，非常值得！
金像影后余香凝、伍允龍、吳業坤、丁子朗、許廷鏗等前晚到灣仔出席時裝活動，余香凝透露8月初偕家人和公司同事到泰國旅行慶功，曬得一身古銅色肌膚，她笑言：「因為4月得獎後一直冇時間慶祝，要開工拍劇，等到依家先有時間，今次一行16人都玩得好開心。」她笑言成為人母後說話比之前溫柔，加上要投入下一個電影角色，故現時說話聲線「柔情似水」，又稱這次將與好姊妹廖子妤拍同志電影：「我今次終於可以一圓上次電影《骨妹》嘅心願，上次係想愛不能愛，今次終於可以，而且導演講明會有咀嘴戲，但唔會有床戲。」
余香凝表示一對子女最近開學：「工作之餘要接佢哋返學放學，近排有啲攰，唔使做運動都自然瘦，所以我依家着咩衫都好睇。（有冇興趣行Catwalk？）有㗎！但暫時應該用唔着我做Model嗰陣練番嚟嘅絕技，希望下次有機會。」
吳業坤想演殺妻角色
剛在佛山拍完劇集《刑偵12》返港的吳業坤透露將推出新歌，很開心可以在唱歌和拍劇中找到平衡。提到《法證先鋒VI：倖存者的救贖》大結局，王敏奕被他禁錮在地下室一年，不少觀眾都認為劇情不合理，吳業坤說：「其實拍嗰陣作出好多改動，希望令劇情更加合理。」他透露監製鍾澍佳曾提議找他太太演出，但最終未能成事，吳業坤笑言：「如果同太太合作，我想演殺太太嘅角色，哈哈！」
伍允龍近日忙於為電影《無名火》後期製作，他透露擔任該電影的動作導演、策劃及演出：「我都係比較擅長拍動作戲，所以暫時對文藝片興趣不大。」問到會否拍「愛情動作片」？他扮傻說：「呢啲係咩嚟㗎？我唔識喎！」提到古天樂將舉行School Tour為學生打氣，伍允龍坦言不清楚這個活動，但如果有需要，他一定會幫手。
