周慧敏告別個唱 歌迷「爆喊」嗌唔好
專注健康 照顧愛貓
「玉女掌門人」周慧敏《地老天荒愛一場世界巡迴演唱會》前晚於澳門倫敦人舉行，她透露繼澳門站後，9月中會到廣州等不同地方獻唱。正當大家以為她又再活躍舞台，她竟宣布今次巡唱後，決定不再舉行大型個人演唱會，令不少歌迷即場大哭！
周慧敏（阿V）前晚於澳門展開巡唱，狀態滿分的她仍是當年顛倒眾生的女神。她唱《自作多情》及一連串快歌揭開序幕，她說：「大家好！唱完一輪快歌開場，真係好有動力！我對今次巡演充滿期待，內心喜悅要大爆發。」之後她唱《台下女主角》送給天上的媽媽。
感激張國榮做守護天使
期間阿V問歌迷：「你哋生命中有冇遇過天使？」歌迷大叫：「有呀，你呀！」阿V笑言：「我焗你哋講㗎，哈哈！我生命中有好多天使，啱啱唱完嘅《如果你知我苦衷》係哥哥（張國榮）寫畀我，佢都係我一個肩上天使、扶持過我嘅前輩，我永遠感激佢。你哋（歌迷）都係我天使，無論高低，多謝你哋都守護我。」然後她請出特別嘉賓黃劍文：「以下呢一位朋友，我哋都係互相守護，係同行者，歡迎黃劍文加入我演出。」然後兩人合唱《流言》、《情未了》、《知己》。
演唱會尾聲的鳴謝環節，阿V強忍淚水說：「其實今次巡演同自己講，搵最純粹嘅心表演，為愛我嘅人唱歌。人生去到唔同階段，追求需要都係會有好大改變。今次呢個巡演，的確係每一場都係倒數時間。今次應該係我最後一次個人大型演唱會！」不少歌迷聞言後爆喊，更大叫：「唔好呀！唔得呀！」阿V續說：「因為我覺得時候差唔多，要專注照顧自己身體、照顧家庭，貓仔都唔細喇，我想多啲時間陪貓仔，同先生希望有更多共處時間，你哋應該理解係咪？」歌迷繼續叫：「唔可以！」
阿V安慰道：「我係唔會唔工作，只係想有多啲時間調節自己。時間好快，錯過咗就錯過咗，好似今晚咁好快就過，已經演唱會尾聲，要唱最後一首歌，我好想聽到大家大大聲一齊唱《最愛》！」演唱會結束，觀眾不停叫Encore，阿V再次出場，連續跟觀眾大合唱約6首歌，最後呼應演唱會名字，以《天荒愛未老》為演唱會完美落幕。
