向Sammi八卦古天樂做嘉賓傳聞 林峯預告明年紅館開騷
香港文匯報訊（記者 子棠）鄭秀文（Sammi）前晚在紅館舉行的第9場《You & Mi 鄭秀文世界巡迴演唱會》請來林峯擔任表演嘉賓，林峯更順勢向Sammi「收風」求證網上流傳古天樂亦在嘉賓名單之列一事是否屬實，林峯又預告自己明年紅館開唱。
前晚Sammi演唱一系列眼淚系列歌曲，到演唱《如何掉眼淚》時，被舞台效果的白色泡泡灑滿一身，她笑說：「成臉都係，頭先仲滴咗啲落嘴，吞埋佢，真係『留藏在血管裏』（《如何掉眼淚》歌詞）。」然後她介紹嘉賓出場，她笑說：「呢個嘉賓呢，我就由細睇佢嘅TVB劇睇到大，呢位嘉賓最近着火呀，好Hot！」歌曲前奏響起，全場立即尖叫，Sammi對觀眾的反應感到驚訝：「咁快認得？兩秒咋喎，咁勁！」
林峯從舞台中間升上，他與Sammi合唱《愛在記憶中找你》時手拖手滿場飛，其間林峯盡顯紳士風度，用手帕替Sammi抹去頭上的泡泡，還自爆因太興奮，出發前在家中弄損手。他問Sammi說：「網上流傳嘉賓名單，點解今日係『待定』？」Sammi即澄清網傳的嘉賓名單是假的。林峯再求證說：「我仲睇到個名單有『龍捲風』即係古天樂，其實你好多次演唱會都請佢嚟！」Sammi即表示：「假㗎，佢話唔得閒喎。」林峯說：「哎呀！早知頭先同你合唱《今期流行》啦，你又跳得。」他還邊說邊跳幾步經典動作，全場爆笑。
Sammi台上向林峯送叉燒飯
隨後Sammi向林峯送上一大碗叉燒飯作禮物，林峯在電影《九龍城寨之圍城》因為一碗叉燒飯展開在城寨的故事，他高舉叉燒飯跟觀眾打招呼說：「大家好，我係『陳洛軍』（《九龍城寨》角色）。」引得全場歡呼。Sammi認真指：「林峯喺呢行嘅演藝生涯，都係有血有淚，呢碗叉燒飯食落去都真係滋味在心頭。」豈料林峯說：「多謝，其實我都係睇你嘅戲大。」Sammi「嘩」聲大叫，笑住返回後台。獨自在台上的林峯說：「我上一次喺紅館唱歌都幾年前，其實我明年都有機會重返紅館，如果再近啲嘅就係9月份喺澳門都有騷，到時希望大家賞面。今晚Sammi個舞台靚到爆，我好鍾意，尤其是可以同觀眾咁近距離接觸。」然後他一邊唱《愛不疚》一邊跟觀眾握手。
安歌環節，Sammi跑勻全場禮物和觀眾鞠躬致謝；完場後再到場外跟歌迷道謝和簽新碟，數百歌迷企滿紅館外和火車站外圍，非常熱情。此外，當晚的捧場客有黃淑蔓、組合Super Girls的Yanny和Jessica、唐詩詠等。
