軒仔美國開騷 力保天價咪
微軟全球死機 無阻歌迷萬里朝聖
張敬軒日前到美國拉斯維加斯舉行演唱會，吸引世界各地歌迷捧場。由於之前在新加坡開騷，軒仔落台跟歌迷互動時，不慎被熱情歌迷撞跌咪高峰，維修費高達兩隻勞力士的價錢！今次他落台前特別提醒歌迷：「唔錫住我唔緊要，但一定要錫住我支咪！」
日前張敬軒展開《The Prime Classics HINS CHEUNG LIVE張敬軒演唱會》美加巡唱，雖然當時微軟死機，令各地機場大癱瘓，但各地歌迷依然排除萬難到場睇騷，軒仔感動說：「多謝大家不理千里、萬里嚟到拉斯維加斯睇我嘅演出，知道增加咗佢哋嚟嘅難度，有啲要飛廿幾個鐘、有啲飛咗去某個地方，然後要再坐十個鐘頭車先到，好彩大家可以齊齊整整嚟到。」
當晚軒仔除了獻唱新歌《青春告別式》，還有不少代表作，例如《櫻花樹下》、《笑忘書》、《餘震》等，都變成「大合唱環節」，軒仔興奮說：「我喺台度見好多朋友一齊唱《餘震》，突然之間見到呢位外籍女士，佢識唱《餘震》呀，佢真係好犀利！突然令我覺得自己好似外國明星，好犀利呀！我第一次見到有外籍人士唱我啲歌，除咗我『遮遮』之外。好神奇！我想話，你（外籍女士老公）真係好有福氣，你老婆愛你愛到連廣東歌都學。」隨即全場歡呼。
軒仔落台跟歌迷握手前，語重心長叫大家冷靜，他說：「上次我喺新加坡，因為大家太熱情撞跌我支咪，我支咪特登send去德國整，整咗我兩隻勞力士嘅價錢，所以希望陣間大家唔錫住我唔緊要，但一定要錫住我支咪，知唔知？哈哈。」歌迷十分聽話，最後軒仔與咪高峰安全返回台上。
此外，軒仔效法Adele去年演唱會上派T恤給歌迷，更是「加強版」，他說：「佢送T恤畀觀眾係有支槍嘅，一射就射到好遠，但今次我冇準備到槍，準備咗一支『炮』……事不宜遲，我請我支『炮』出嚟先，呢個美國friend好勁，佢可以射得好……唔係，係揈得好遠。」隨後他與友人瘋狂將T恤拋向觀眾，氣氛熾熱。
