黃翠如提防扒手 齋帶信用卡傍身
赴法國主持奧運 背200頁天書
黃翠如將於本月22日飛往法國為TVB主持奧運節目，她透露近日獲不少朋友提醒，要提防當地扒手，故屆時她不會帶證件出街，亦不會帶太多錢，只帶信用卡傍身。她又稱主持奧運要記很多資料，會在坐飛機時背熟逾200頁的「奧運天書」。
方力申（小方）、黃翠如、陸浩明、潘靜文與一班專業評述員及運動員，昨日出席《2024 巴黎奧運 盡在TVB》宣傳活動。首次做奧運主持的翠如拿着厚達逾200頁的「奧運天書」，她表示本月22日啟程往法國，會在機上努力溫書：「我哋之前開會商量過，主要運動項目係唔關我事，我主力做周邊嘢，例如奧運旅遊資訊同氣氛，不過都要搵好多資料，感覺似以前做旅遊節目。」
她相信待奧運正式開始後，她與其他同事都會忙到早餐也沒時間吃。問到老公蕭正楠會否擔心？翠如說：「佢有叫我帶多部電話，又幫我搵一個可以掛喺身嘅手袋仔，大家又提醒我搭地鐵要小心扒手，到時我唔會帶證件出街，錢都唔會帶多，只帶信用卡傍身。」
難得參與奧運，翠如希望可以入場感受開幕氣氛，亦想看沙灘排球、射箭、賽馬、跳水及划艇等項目：「我有問過小方，佢話其實採訪隊大部分時間都喺室內睇電視直播，所以採訪運動員一定冇我份，不過會去奧運村嘅餐廳碰運氣，大前提當然係唔會騷擾到運動員。」
舊愛拍拖 小方唔回應
小方舊愛鄧麗欣早前公開承認有台灣新男友，問他可有送上祝福？小方說：「呢個係好問題，其實做藝人好難，有回應會俾人鬧，唔回應又俾人鬧，所以今次我想試吓唔回應，睇吓大家鬧我乜嘢再回應。無論我做乜都好，唔鍾意我嘅人都會鬧一餐。」提到日前他看溫網比賽，成功向荷里活巨星湯告魯斯「集郵」兼攞簽名，他說：「我有同佢介紹我都係演員，最鍾意佢拍嘅《甜心先生》。我有畀佢睇我買佢嘅親筆簽名相，估唔到佢叫我唔使再買，即場送一個簽名畀我。」問到有否向對方自薦客串電影《職業特工隊》系列？他說：「我已經𢱑爛塊面第一個衝去佢身邊，真係Mission Impossible（不可能任務）！」
