千嬅李幸倪獻唱新城台歌 薛家燕讚眾志成城唔簡單
香港文匯報訊（記者 阿祖）今年為新城廣播有限公司成立33周年，推出全新台歌《沿途有我》，歌曲道出人生起跌，只要堅守信念，最後定能撐過，MV並於昨日首播。
《沿途有我》十分榮幸得到一眾歌手好友全力支持獻唱，包括楊千嬅、周吉佩、李幸倪、泳兒、梁釗峰、吳業坤、黃淑蔓及林愷鈴等；新城廣播更出動台前幕後總動員數十人合唱及拍攝ＭＶ，其中「鎮台之寶」薛家燕、「元祖級」兒童節目主持譚玉瑛以及歐陽德勛也驚喜獻聲。家燕姐開心表示以往只唱過節目主題曲，但為新城唱台歌卻是第一次：「難得請到周禮茂為我哋填詞，首歌嘅旋律好好聽，歌詞好正能量，我好欣賞，做一首台歌一定要令人覺得有正能量同挑戰性，幾十人一齊唱，呢個設計好唔簡單，證明佢哋好用心做，希望我唱出嚟唔會失禮，亦都知道喺Steven（馬浚偉）嘅領導下，大家都將所有節目做好，好感動。」
譚玉瑛表示：「我過往幾十年只係唱兒歌，無咁多呢啲抑揚頓挫，今次好彩有麥皓兒指導我。」 歐陽德勛自爆馬浚偉邀請他錄台歌時十分客氣，「佢問我有無時間光臨參與錄音，為𠵱家個士氣打氣，又強調係一首好有意義嘅台歌，我話乜你咁客氣，你唔預我會嬲。」
