羅啟豪挑戰自己開live 竟自認「走音王」？
香港文匯報訊 工作忙個不停的羅啟豪（Ramon），日前在社交平台上做即時聊天（live chat），不止和「豪殼」（歌迷暱稱）傾偈解答他們的問題，還大爆他在錄音室錄個人單曲時的失魂事，搞到錄好都要重新唱一次。
出名害羞又內斂的Ramon之前上網開live都是拍住其他歌手，今次是首次自己開live，節目個多小時都毫無悶場。Ramon主要是回應網民留言，亦因為不少網民不時點唱，Ramon在沒音樂伴奏下都話唱就唱，歌曲包括《大會堂演奏廳》、《Do Re Mi》 、《准我》、《如果這是情》、《天意》、《綿綿》等，連《心經》、經典朱古力奶、魷魚絲、檸檬茶廣告歌都唱埋。清唱不但沒影響Ramon音準，更凸顯他的靚聲。
雖然唱得，但Ramon卻在live chat中自認是「走音王」？原來是因為有「豪殼」笑他說話時會間中「走音」，他都直認有這個問題，指可能因為未找到適合的方法去保養把聲，仲笑封自己係「走音王」。
講到唱歌，Ramon分享當日為自己第一首個人單曲《相信 相信》錄音時的失魂事件，有鼻敏感的Ramon錄音當天鼻敏感發作，令他越唱越鼻塞，但卻不記得帶噴鼻藥在身，工作人員幫他返屋企攞。在Ramon攞到噴鼻藥後，一噴個鼻就通晒，把聲即刻靚晒。監製就建議之前錄的全部唔要，重新錄過。不過 Ramon 話好彩就算連埋這個小意外，都只是錄了四個小時，還得到監製稱讚他錄得好快。
而「中1生」將在6月22日及23日於旺角麥花臣場館舉辦《一班好聲音「十」力無限演唱會》。「豪殼」問Ramon怎樣為演唱會準備時，Ramon說努力戒食零食，還搞笑要求「豪殼」幫忙不要送零食給他。Ramon在開live後表示：「一年前未入行嘅自己真係無可能做到一個無人同自己講嘢嘅 live。所以好幸運呢年帶畀自己好多正面嘅改變，我會繼續努力喺唔同方面去提升自己，希望將自己嘅音樂帶畀更多人。」
