黃宗澤懶理緋聞 嗌蔡潔做老婆
《執法者們》煞科慰勞宴打情罵俏
緋聞情侶黃宗澤（Bosco）與蔡潔於新劇演夫妻，二人前晚出席活動時，Bosco毫不忌諱稱呼女方做老婆，又不停打情罵俏。事後他笑言不擔心跟蔡潔再傳緋聞，雙方實在太熟，拍咀戲也不感尷尬。
吳啟華、黃宗澤（Bosco）、羅子溢、洪永城（Tony）、蔡潔及陳瀅等前晚出席新劇《執法者們》煞科慰勞宴，Bosco豪不避忌，嗌蔡潔做老婆，非常玩得。二人受訪時表示第8次合作才演一對，Bosco說：「經過7度磨練先做到一對，不過係好悲慘故事。（冇得錫？）有得錫，咁靚嘅女仔有得錫梗係錫啦！」他笑指與蔡潔太熟，拍咀戲不感尷尬，但強調咀戲不是重點：「係我咁耐以嚟為一個女人喊得最多嘅一套劇，好慘！」
蔡潔大讚Bosco演得好，喜歡看他的打鬥戲，以及於劇中為她孭手袋及流淚，Bosco笑言：「蔡潔好似讚緊你，但其實係插你一刀！」他踢爆蔡潔有更性感演出：「我都諗緊拍完之後播唔播到出街，上次佢已經露白滑玉背，今次仲突破，所以觀眾要留意。（有親熱戲，擔心再傳緋聞？）以前傳過，依家再傳都唔會傳得出啲乜！」
吳啟華表示跟陳瀅曾合作拍劇，但全無交集，今次也只得一次接觸：「就係佢嚟拘捕我嗰幕。」並讚女方演技有進步。問到若再合作想演什麼關係？他說：「當然係父女。」陳瀅則笑言：「姊弟都冇問題。」問到在劇中有何突破？她說：「原本有一幕性感沖涼戲，講我沖緊涼時馬國明走咗入嚟，當日我仲帶泳衣同打底裝備到場，點知導演見到我就話唔使喇，取消沖涼戲，改咗喺廚房煮嘢食。」她笑言至今仍不明原因。
洪永城想與楊茜堯拍情慾戲
子溢跟Tony太太梁諾妍於劇集《家族榮耀之繼承者》有情慾戲，Tony指事前看過劇本，但當時太太剛懷第2胎，仍未能宣布，故唯有通知子溢，叫他拍攝時盡量「輕手」。問Tony想不想「報復」跟子溢太太楊茜堯拍情慾戲？他笑言：「梗係想啦！但我邊有咁嘅榮幸，無綫有好多人排緊，有排都未到我，哈哈！」問到會否限制太太演情慾戲？他坦言：「我知道做戲係工作一部分，唔會設限。」
