邀拉姑任歌迷會會長慘食檸檬 譚輝智與中2生 玩Cosplay唱兒歌
香港文匯報訊（記者 梁靜儀）《中年好聲音2》亞軍得主譚輝智，率先跑出開個唱，首個個人演唱會《Fight For You》 前晚（26日）於九展Star Hall舉行，全場爆滿，除了太太、父母及一班親友拉隊捧場外，《中年好聲音1》的羅啟豪及李佳，以及「忠粉」拉姑（狄波拉）及陳淑芬等亦有捧場。譚輝智即場邀拉姑任歌迷會會長慘食檸檬，其後與中2生玩Cosplay唱兒歌。
輝智以一曲《我恨我癡心》在性感女拳手伴舞下登場，又唱又跳炒熱現場氣氛，當然唔少得歌迷翹首以待的《屈到病》。台上輝智感觸地表示由比賽至今天踏上這舞台，一切仍像在發夢一樣：「成40歲人竟然可以開演唱會，衷心感謝大家一直嘅支持。」他又指很欣賞一位16歲便出道的歌手，會經常聽對方的作品：「今晚請到佢……阿媽拉姑嚟！」他望向台下的拉姑，笑問：「好唔明你個仔咁出息，點解鍾意我呢Pat嘢？」之後便唱出謝霆鋒的《愛後餘生》，台下拉姑即被感動得眼濕濕。輝智又當眾邀請拉姑做他歌迷會會長，拉姑說：「我有個謝霆鋒邀請我做會長，所以多謝你哋邀請，我做『阿四』得喇，因為我以前係『四嫂』，可幫佢做『阿四』。」顏米羔就游說拉姑可加入歌迷會做會員。
深情表白搞喊太太
在唱過張學友的《講你知》後，台上又播放輝智一家四口的溫馨家庭相，他深情地望向台下的太太說：「呢年我走咗去唱歌，尤其呢排要準備今次演唱會，所以好少見到你，你幫我處理咗背後好多嘢，又要湊住小朋友，你都唔夠瞓，多謝你。」太太即感動流淚。在唱出個人新歌《多麼感激》前，他又感謝太太、家人及一直支持他的好朋友。
當晚輝智又請來一班《中2生》，以及肥媽等擔任表演嘉賓，古淖文個人獨唱《Stand Up》，而顏米羔、劉威煌、陳俞霏及陳燕娜等人就扮卡通人物，與化身卡通角色「柯南」的輝智大唱多首兒歌。
輝智全晚唱足3個多小時，60多首歌，為免超時，原本安歌環節中安排輝智唱其飲歌《歸來吧》也被迫取消，令不少歌迷失望，最後他以一曲《與我常在》為演唱會畫上完美句號。
給個唱表現打合格分
完騷後輝智接受訪問，他坦言對自己的表現只是一般：「第一次一次過唱咁多首歌，可能今日個氣氛令我仲放開咗，去到尾段體能上有啲危僅僅夠。」說到他唱《我恨我癡心》入錯拍子，他坦承不只一首，有幾首歌拿捏得不夠準確，要再累積更多經驗，所以今次演出只給予自己合格分數，還有很大進步空間。談到他在台上向太太示愛時，搞喊台下的太太，又被太太笑稱他做「死仔包」，他稱因燈光影響發現不到太太落淚：「佢平時唔會叫我死仔包，會叫老公，我就叫佢個名，其實唔止向老婆，係將所有嘢都攞晒出嚟講吓，因為唔知仲有冇第2次機會，所以要珍惜機會，我結婚都冇講咁多嘢。」另外，他在台上提起小朋友時顯得眼濕濕，他表示綵排時每當唱《大個女》時也忍不住眼淚，因會想起自己的小朋友。至於可會有Part 2？他笑說：「Part 2 ? Part 1 都爭啲搞唔掂，唔諗住，我想休息吓。」他又多謝顏米羔，表示欠對方很多人情，等待做對方演唱會嘉賓。
除了搞喊太太，當晚輝智還搞喊其「忠粉」拉姑，說到他在台上邀請拉姑任歌迷會會長，結果被拉姑請食檸檬，他搞笑說：「好正常，唔通唔請咩，檸檬喎！我咪唱檸檬（霆峰）嘅歌。」輝智又笑指真的有問拉姑為何喜歡自己，但她從未解答過，他估計可能是自己個樣沒有攻擊性。
