曼聯鐵桶陣 守「城」博半細
防線主力回歸 迎英足盃決賽
上周有驚無險實現英超四連霸的曼城，明晚將於英格蘭足總盃決賽，在溫布萊硬撼同市宿敵曼聯，力爭成為前無古人的英超/英足盃「雙料冧莊」得主。論實力與狀態，曼城都明顯高出不止一截，不過「紅魔鬼」近日接連有喜訊傳出，多位主力相繼復出，尤其防線最有卡士的利辛度馬天尼斯與華拉尼都有望齊齊擔正，決心死守之下，上半場預計難有多入球，半場[1.5]細盤值得捧場！（無綫myTV Super周六10:00pm直播）
由哥迪奧拿帶領的曼城，雖然衛冕歐聯失敗，但回到本土賽確實大超班，單是在聯賽爭霸上，即使阿仙奴今季踢出近廿年的最佳水平，最終仍被曼城追上再反超。曼城寫下英格蘭聯賽史上首個四連霸，亦是該隊近7年聯賽的第6冠，超級王朝確實無人不服。
大軍今戰繼續可以強陣出擊，就只得門將艾達臣摩拉斯上場聯賽勇戰眼眶受傷骨裂，今戰會由盃賽門神史堤芬奧迪加擔正把關，後者今季每次上陣都有好演出，同樣值得信賴。至於中前場主力如射手夏蘭特、中場菲爾科頓及奇雲迪布尼都會繼續擔正爭勝，但夏蘭特近期狀態稍見下滑，面對曼聯的死守，未必能在上半場攻陷對手。
利辛度拍華拉尼可靠
曼聯方面，阿根廷鐵衛利辛度馬天尼斯前戰聯賽復出後備登場，上場更復任正選，有這位永遠鬥心驚人的硬朗守將壓陣，「紅魔鬼」防線確可打高幾皮波，而季後離隊的法國名將華拉尼亦已傷癒復出，其卡士與經驗都是世界頂級，可令曼聯防線更見穩固。再者，包括連迪路夫、美臣蒙特與安東尼馬迪爾近日都已復操，與前隊長哈利馬古尼都有望趕及重返賽場候命，縱然實力狀態都不及曼城，但在決心死守下，博該隊守住半場開細盤，重演近4次交手3次開「半細」，絕非貪心。
