詹天文捱痛植髮 唔怕抬高頭望人
獲母親贊助5位數做療程
「聲夢」歌手詹天文（Windy）一向受「髮線高」困擾，曾自爆16歲已想植髮，但家人以「未成年」為由阻止她。今年18歲的她早前獲母親贊助5位數做植髮療程，雖然要打多支麻醉針，過程痛苦，但她認為非常值得，因可重拾自信，被風吹起頭髮都可以抬高頭望人。
薛家燕、范振鋒和思敏主持的新城節目前晚舉行「《開心大派對》愛·最美麗維港之夜2024」晚宴，筵開40席與聽眾補祝母親節，邀得李龍基、羅啟豪、支嚳儀（Venus）、詹天文、張馳豪、潘靜文、林智樂等擔任表演嘉賓。
Windy透露已為自己的18歲生日送大禮，更圓了人生其中一個願望，就是做植髮療程：「之前我額頭好禿似貓耳，植髮中心話我嘅髮線高達9厘米！今次得到媽咪贊助5位數完成療程。雖然植髮過程好痛苦，要打好多支麻醉針好痛，但好值得，唔使再用成支髮際線粉，亦重拾自信，依家俾風吹起頭髮都可以抬高頭見人。」在旁的Venus也關注頭髮問題，不斷向Windy取經。問兩人可想合作主持節目？Venus笑言：「可以，18歲同38歲。但我成日要剪片，近視深咗50度。」
李龍基重振食慾
提到有傳Windy到海外升學，更有機會與姚焯菲（Chantel）報讀同一間大學，Windy說：「我哋有傾過，如果做到校友都幾得意，但佢同我揀嘅科目唔同，要讀4年。（暫停歌唱事業？）其實Chantel放假就返香港出新歌同做嘢，我都可以。雖然返學要兼顧事業會辛苦，但覺得喺外地升學可擴闊眼界。」
李龍基表示翌日要到南山為6月開騷作準備，不過是即日來回，因每天都要到懲教所探望未婚妻王青霞（Chris）：「Chris瘦咗，但我就肥番少少，因為好多嘢睇開咗，唔會好似之前食唔安、瞓唔樂。」並幽默稱有助Keep Fit，站在台上人也輕鬆。提到案件本月28日再度提堂，他認為應該會有答案，但不管結果如何，都會盡力幫助未婚妻。對於「何伯何太」事件成為全城熱話，記者笑指李龍基被搶風頭，他笑言：「非常之好！但我唔回答喇，始終係人哋嘅事。（介意被比較？）睇過有報道將我拉埋一齊講，冇所謂，一笑置之。」
