當錫爭口氣 獨行俠叫胡
收火打好波 發力交三雙
NBA西岸四強昨晨上演「天王山之戰」，獨行俠與雷霆賽前場數打和2:2，贏出這場關鍵戰一方，據統計將有高達82%機率晉級。多得「天王山戰神」艾榮延續其關鍵戰全勝數據，加上另一巨星當錫及時收火打出「三雙」身價波，獨行俠昨仗作客終以104:92取勝，爭入西岸決賽正式叫胡！
獨行俠在上場G4浪費了一度領先14分的優勢，在主場被雷霆反勝，場數追和2:2，主力當錫在這個系列頭4戰平均投射命中率只得39%及22分，遠低於他在上個季後賽系列水平，完全展現不出他的常規賽得分王身份。不過來到G5，當錫終於修心養性打好波，減少與球證爭拗，結果昨役他錄得22投12中，射入31分兼有11助攻10籃板，也是他季後賽生涯的第6次「三雙」。
當錫解釋：「我只係專注去打籃球，有啲時候我會忘記咗我所愛、我所應該做嘅嘢。我將自己專注力放番喺籃球上，帶住笑面去打波。」主帥傑特讚賞他打法進取，無所不能，好拍檔艾榮亦給予當錫鼓勵與認同：「我認為今日佢同我哋都學識咗，只要專注喺自己比賽，做番正確嘢，我哋就會打出好表現。我唔係要批評佢，講到球證好完美，事實有時批評球證都係有道理，但我覺得佢今日搵到一種健康嘅平衡。」
天王山戰神艾榮好腳頭
艾榮今場表現一般，全場只錄得12分4助攻2籃板，不過這位巨星後衛原來歷來在所謂的「天王山之戰」，當系列賽處於2:2情況，他在G5是錄得4戰全勝，包括上圈對快艇的勝仗，在關鍵時候總有最適當發揮，帶領球隊贏出這場關鍵戰，繼續晉級。獨行俠將於周日回到主場迎戰雷霆，只要再贏一場便可殺入西岸決賽，昨仗攻入30分的雷霆重心基治奧斯阿歷山大表示：「我哋氣氛冇變，心理冇變，會一場一場去打，雖然今場輸咗，但下場我哋會贏番。」
同日東岸四強G5，塞爾特人主場以113:98大勝殘陣騎士，以總場數4:1取勝，近8年第6次打入東岸決賽。
