艾美利亞鮮肉「大」起巴塞
篤定降班 用人為未來
西甲第36輪，榜尾艾美利亞主場挑戰次席巴塞隆拿。艾美利亞早已篤定降班，不過近期所見不但未有垂頭喪氣，反而豁出去大踢進攻足球，交出令人讚賞的悅目表現，連仗入波精神面貌一流，面對實力高兩皮的巴塞亦躍躍欲試玩對攻。推介首選[3.5]大盤。（NOW 632台周五3:30am直播）
艾美利亞上季幾經艱苦才護級成功，今季季前更有多名主力被撬走，整體戰鬥力弱上加弱，開季後便一直捱打沉淪榜尾，到上月底主場1:3負基達菲，已提早5輪篤定降班。不過這個結果早在會方預期中，教練比比美爾近期更表明，正着手為下季陣容做準備，除幾名狀態火熱攻擊球員繼續得到重用外，於多個位置都大膽起用副選及新人。
基於已經釋放壓力，艾美利亞一班小鮮肉落場毫不惜力放懷進攻，尤其19歲小將盧卡羅美路，季尾頻獲正選後越踢越出色，加上基達菲借將洪都拉斯前鋒安東尼羅辛奴腳風超順，近4場聯賽共轟入3球。整體表現完全不似包尾弱旅，近5場聯賽場場入波共轟入7球，作客2:2逼和皇蘇及2:3僅負貝迪斯都踢得虎虎有威。球隊實力雖與巴塞有一大段距離，但首循環作客亦僅負2:3，上季主場更曾有爆冷贏巴塞紀錄，今晚主場再遇強敵反而令一眾「小鮮肉」大感興奮，預期會繼續放下勝負包袱，以取得入球為目標。
「地上最強」有前無後
「地上最強」巴塞隆拿自歐聯主場被PSG反勝出局後，表現回復反覆，近4場西甲勝負參半，轟入10球亦失掉9球，踢法同樣有前無後。上輪主場擊退皇家蘇斯達，而爭亞軍對手基羅納卻剛於周三凌晨主場不敵維拉利爾，現時巴塞領先基羅納一分並少賽一場，爭亞軍壓力大減。球隊中後場陣容不整，除巴迪及加維長期養傷外，中堅阿拿奧祖及中場法蘭基迪莊都因傷缺陣，防中根度簡停賽，今仗遇包尾對手當然以攻代守與主隊對攻。前線老將利雲度夫斯基狀態回勇，耶馬爾及拉芬夏亦輪流有建樹，作客艾美利亞甚有機會再開入球騷。
