拜仁皇馬激鬥和波 金玟哉比寧咸鬥衰
歐聯四強首回合昨晨上演精彩對攻好戲，結果主場的拜仁慕尼黑與皇家馬德里打和2:2。今場焦點，是兩度犯錯造就皇馬兩個「士哥」的拜仁後衛金玟哉與猶如「失蹤」的皇馬中場祖迪比寧咸，二人次回合能否生性踢好波，將成球隊勝負關鍵。
皇馬靠雲尼斯奧斯上半場中段入波領先，換邊後拜仁靠利萊辛尼與哈利卡尼各建一功一度反超，但雲尼斯奧斯完場前7分鐘射入極刑，終助皇馬扳平。賽後，拜仁主帥杜曹直言金玟哉需為兩記失球負責：「佢太貪心喇！第一個失球，佢太早起動，俾卻奧斯捉到應交出妙傳，佢呢球係過分進取想捉路。第二球佢又心急踢低洛迪高高斯，我哋當時5個打2個，根本唔使咁踢。面對咁高質素對手，犯錯就梗會受到懲罰，依家唯有向前望啦！」
至於今季加盟皇馬後一直表現突出的比寧咸，繼上圈歐聯兩鬥曼城都無甚表現後，今場又一次令人失望，全場零射門，60次觸球只得1次關鍵傳送，並有10次失掉球權。連同之前効力多蒙特年代，比寧咸至今9鬥拜仁只得2和7負，假如皇馬要晉級決賽，必須要比寧咸打爭氣波。對此，皇馬主帥安察洛堤繼續力撐：「佢今日踢得麻麻，應該係受傷患影響，但佢下星期三會喺最佳狀態回歸。」
