靚湯食得太飽 凸腩似有喜
婚後更慳 想買安樂窩
湯洛雯（靚湯）與黃佩霞昨日出席保險公司宣傳活動，靚湯笑言相隔十多年後再接觸瑜伽運動，現時跟隨瑜伽高手黃佩霞學習後，睡眠質素有所改善。提到早前踩單車時肚凸凸疑有喜，靚湯笑着解釋當日只是吃太飽，令胃腩現形！
一直有跑步習慣的湯洛雯表示，學習瑜伽能令人身心平靜：「依家多咗肌肉唔知係好定壞，但個人變得開心同更精神，以前我好容易攰。」問到會否與老公馬國明一齊做瑜伽？她說：「佢鍾意踢波，相信瑜伽唔啱佢，但都會帶佢去體驗，當做拉筋。其實我一直有壞習慣，就係睡眠質素唔好，可能以前開工日夜顛倒，做瑜伽後就有改善。」
提到早前踩單車時被指肚凸凸疑有喜，靚湯笑言：「可能我食飽咗，胃腩走咗出嚟，如果有好消息一定話畀大家知。」她指老公婚後一直劇接劇，連度蜜月也未成行，希望今年暑假成事。問到是否停工準備做人母？她說：「我冇講過唔接劇，如果公司有安排都會做，但依家好享受婚後生活。（跟咗黃佩霞學瑜伽，有冇請教對方生仔秘笈？）呢啲私事唔使請教啦，依家好OK，生活開心愉快，長輩又冇畀壓力，睇吓之後度蜜月開唔開心啦！」
黃佩霞想演嫲嫲角色
榮升馬太的靚湯坦言仍未習慣新稱呼，感覺像失去自己的身份：「反而老公好開心有人叫我做馬太，佢會陰陰嘴笑，我就覺得似做以前阿媽會做嘅嘢，原來真係會『哦』身邊人，因為想佢樣樣都好，身體同心靈都健康。」問到財政大權是否落在她手上？她說：「我哋財政獨立，如果要用好多錢都會問佢，其實我哋結咗婚比以前更慳，因為想買一個安樂窩，趁樓市有回落想入市，睇啱就住一世。」
由幕前轉型做瑜伽導師的黃佩霞，大讚靚湯用心學習。問到會否傳授生仔秘笈給對方？黃佩霞笑言若靚湯有需要，會樂於分享。她指不少學生都有意生育，但愈想生就愈有壓力，所以放鬆心情最重要。問到有否興趣復出幕前？她自嘲：「如果有摩登嘅嫲嫲角色都可以，其實仔女都問過我點解唔再拍戲，因為平時喺公司已經夠忙。」
