狂炒車路士 阿仙奴上下興奮爭標
昨晨上演的英超倫敦打吡，爭標分子阿仙奴在主場令人意外大炒車路士5蛋，賽後主帥阿迪達大讚球員鬥志高昂兼興奮，反觀「藍戰士」領隊普捷天奴則對球員放棄態度極之失望。
李安度杜沙特在開賽4分鐘便為「兵工廠」先開紀錄，換邊後主隊靠賓韋特及夏維斯各自梅開二度，以5:0大勝收場。賽後阿仙奴以34戰77分排榜首，拋甩利物浦及曼城3分及4分，但打多一及兩場。阿迪達表示：「所有人，包括上陣唔多嘅球員都好，都有重要角色，令大家團結起嚟！成個更衣室都知道為緊乜去爭勝，大家都好興奮同投入。」
連同今場勁失5球，車路士今季累積失掉57球，是隊史在英超年代最差，普捷天奴賽後失望說：「我半場同大家講，點可以個頭開得咁差，點知換邊後即刻失多兩球，然後成隊就放棄晒！上周末喺溫布萊對住曼城都踢得好，但今日就變到咁差。」老將堤亞高施華尾段大落後才被派上陣，之前有過「搞事」前科的施華嫂，完場後在社媒發文，留低三個表情公仔，喻意「唔睇、唔聽、唔講」，隔空又幫老公出頭。
