祖兒慳儉積穀防饑
天后容祖兒昨日以品牌大使身份出席銀行活動，她坦言對理財沒有概念，幸好多年來得媽媽幫手打理：「因為媽咪有時都攰，我同佢講不如請個人幫手，佢覺得自己一手一腳做會好啲，我唔想佢咁辛苦，花咗好長時間說服佢，交畀專業團隊處理。」談到容媽媽投資及理財有道，問祖兒擁有多少個物業？她避談：「都係嗰啲，冇再買，依家樓市好緊張。（樓市跌咗，有冇再買？）敵不動我不動，穩守崗位。（咁你有冇試過自己投資？我係盲拳打死老師傅，有時我會畀到啲好選擇媽咪，我係憑直覺，但係冇錯囉！（有冇試過損手？）有贏有輸，但唔多，唔會係慘烈。」祖兒自認慳儉，會積穀防饑：「我最大目標係照顧媽咪，提供舒適嘅生活畀佢，同埋實現自己嘅夢想。經理人會覺得我成日都好緊張，反而阿Sa（蔡卓妍）就好輕鬆。」
另外，早前祖兒出席友人生日會，林青霞是賓客之一，祖兒開心表示：「我係第一次見佢，同佢傾咗一句，佢知我係乜水，好開心！佢話我唱歌好聽，又讚阿Sa演戲好。佢保養得好好，一身白色感覺好Cool。」
