附加賽終極鬥 熱火難屠「牛」
鐵血畢拿韌帶傷或長休
去年在NBA季後賽帶領熱火幾乎成功上演「老八傳奇」，打入總決賽僅負金塊的「鐵血戰神」占美畢拿，昨晨在東岸附加賽第7對8位之戰中，率領熱火作客激鬥76人；最終熱火以104:105飲恨敗陣之餘，畢拿更因為帶傷作戰達40分鐘，疑似MCL內側副韌帶受傷，在明晨的八號種子爭奪戰主場對公牛時，或會被迫缺陣，熱火出線前景絕不樂觀！
在東岸常規賽取得第八位的熱火，昨晨面對第七位的76人，半場帶出12分之多，可惜最終缺乏後勁，僅以1分之差被反勝。熱火巨星畢拿在首節尾段一次假動作後上籃，落地跌低，再被76人的小奧比利落地時壓傷膝部，畢拿獲判罰球兩射中一，然後繼續展現其一貫驚人鬥志戰至完場，全場上陣40分鐘，交出19分5助攻5籃板，隊友希路亦有25分進賬，可惜面對自明星中鋒艾比特復出後勢如破竹的76人，仍只能敗陣而回。贏波後的76人拿到東岸第七號種子之位，季後賽首圈將鬥紐約人。
據知，畢拿在昨日較後時間將會接受磁力共振檢查，但來自美媒消息指，這位34歲小前鋒疑似是韌帶受傷，或會有手尾跟，未必能趕及明晨的生死戰中復出。對於自己的傷勢，畢拿表示：「我估係佢（小奧比利）落地撞到我膝頭，依家我只可以講個感覺麻麻。我好似做唔到幾多嘢，唯有希望聽日起身會好番，可以行得走得啦，不過依家唔係咁囉！」
熱火明日的對手公牛，在昨晨第九、十位球隊對決中，以131:116主場大勝鷹隊，公牛主將迪羅辛今場交出22分，但都不及其隊友高比韋德狂轟42分兼有9籃板搶鏡；而熱火一旦在畢拿養傷之下，面對勢勁的公牛隨時會落入下風。（NOW 641台周六7:00am直播）
錫安缺陣 鵜鶘鬥帝王有隱憂
至於明日另一場大戰，則是由鵜鶘主場對帝王。鵜鶘剛戰亦有主力錫安威廉臣受傷，昨日已經證實是拉傷大腿肌肉，至少休戰兩周，陣容不整之下，要對抗上場大炒勇士的帝王，難免落入下風。（VIU TV 99台周六9:30am直播）
