替賣了樓港人擔心
湯文亮博士 紀惠集團行政總裁
有朝早跑步，有跑友話日前去買新樓投資，聽到有不少人講普通話，講粵語的反而很少，見到咁嘅情況，後悔只入了兩張飛，應該入多幾張，提高中籤比率，現在究竟有幾多內地人買新樓 ?
我話今次大件事，亦替那些最近賣了樓的香港人擔心，撤辣之後，內地人買樓多了不知幾多倍，其實，那些買樓內地人並不是今日才做決定，而是一早已經有打算買樓，不過唔忿氣要畀30%辣招稅，現在唔使畀，點解唔買，況且買樓的錢已經一早準備好，香港樓價又下跌了兩成，計計埋埋足慳了60%，唔買就笨，況且自己唔住都可以租畀賣了樓的香港人，租金亦有保障，跑友話我替那些賣了樓的香港人擔心是有根據的。
新盤超購未能一Q清袋
最近有新樓盤開售超額認購65倍，點解不能夠一Q清袋，是否樓市仍未復甦，我話唔係，最大原因是那個樓盤比較貴，大多數是千幾二千萬，買得那些樓盤的人，點解要買樓盤最差的單位，現在大把新樓盤推出，留番啲錢買第二個新樓盤好過，所以，98%銷售率已經很好，不能再苛求。
相反，如果是一個比較普通樓盤，每個單位只是五六百萬，超購65倍，會不會一Q清袋呢 ? 如果是那些比較平價樓盤，唔使65倍，就算30倍都有機會一Q清袋。
講開又講，撤辣之後第一個月，租務升了26%，租金則持平，業界估計今年租金會輕微下跌，而我一早已經同租樓的人講，應該支持撤辣，否則即是同自己荷包過唔去。
