憂演技小學雞 傅明憲唔敢復出
黃百鳴生日願望 盼電影業復常
前晚黃百鳴與「開心少女組」等到九展的戲院出席「《開心鬼》四十周年放映活動」，順道為黃百鳴慶祝生日，黃百鳴坦言生日願望是希望電影市場盡快復常。已退出幕前的傅明憲坦言無意復出，擔心演技似「小學雞」，跟不上現時演員的步伐。
「《開心鬼》四十周年放映活動」前晚在九展的戲院舉行，電影監製、編劇及主演黃百鳴，邀得昔日「開心少女組」的李麗珍、袁潔瑩、傅明憲、導演高志森及編劇馬偉豪出席，其他嘉賓還有葉子楣、關寶慧、黃玉郎、楊明與女友莊思明等，場面熱鬧！久未出席公開場合的袁潔瑩素顏示人，她與李麗珍均沒接受訪問。曾患厭食症的袁潔瑩早前被指再度暴瘦，前晚現身時更見她瘦到面凹！
黃百鳴受訪時表示：「今日係我正日生日，亦係《開心鬼》40年前嘅今日開鏡，我個女特登搵番套戲出嚟，做一個另類生日慶祝，時間過得好快。」問到如何慶生？他說：「就係同400位好朋友睇番自己嘅作品，好開心搵番導演編劇，麥秋老師當年搞咗個中學生戲劇比賽，我選佢做冠軍，攞咗佢劇本做藍本，馬偉豪仲做埋編劇，佢哋今日都有嚟。（有咩生日願望？）身體健康，公司拍多啲好戲。（想電影市道快啲好番？）應該會好㗎喇，我哋齊齊做好佢。」
曾用藝名 冇人記得
有份參演第2集《開心鬼放暑假》的傅明憲分享昔日拍攝趣事：「記得第一日開工，我屋企人唔放心，叫咗個工人姐姐陪住我，嗰時係14歲。」她透露入行時用藝名「孫慧」，直至加入無綫後才用回真名：「所以冇人記得我呢個藝名，記得當年有個遊戲節目嘅100萬終極問題，問『開心少女組』有邊4個人，但冇人記得孫慧同傅明憲係同一個人。」
傅明憲表示當年拍《開》片很開心：「做學生唔使乜嘢演技，做番自己，拍戲時又有嘢食，好開心。（想唔想再拍？）唔會請我做學生啩？做『逃學威龍超級留班生』咩？或者做校長囉！」問到有否戲癮？她坦言無意復出：「我驚跟唔上，平時睇戲見啲演員好犀利，我覺得我出番嚟會好小學雞，完全跟唔上！」此外，她透露擔任香港愛護動物協會會長已21年，在青衣設立的「愛護動物協會賽馬會百周年中心」已開幕。
