出新歌慶19歲生辰 炎明熹拍MV入戲爆喊
香港文匯報訊（記者 子棠）炎明熹（Gigi）推出新歌《還有一艘救生艙》慶祝今日（9日）的19歲生辰。生日前夕出歌，Gigi特別為這份給自己的生日禮物奉獻了多個第一次。
Gigi表示今次起用全新音樂班底，並且對新歌「一聽鍾情」，聽到Demo歌詞已被打動到喊，更首次大膽地向監製提出編曲上的想法。除了第一次參與編曲，Gigi在MV中亦首度與男主角如此親密及成功喊出，演繹被男友背叛的淚崩戲。Gigi直言：「開拍前，導演已經同我講咗一次個故事，雖然我冇經歷過，唔可以話感同身受，但至少拍MV時畀到我一種纏綿、開心、幸福嘅感覺，當然我哋嘅男主角都好帶動到我入戲，我亦冇諗過會喊到出嚟，平時一係喊唔到，一係就谷住咗，feel到要喊，但又冇眼淚；加上當時手持的手機時間咁啱係『520』（國語：我愛你），所以一望到就喊，所以拍攝當日係好幸運嘅一天。」Gigi在幻想與男主角對話的一幕中，不單止做到淚水決堤，更做到雙唇不自覺地抖震，呈現了被感情出賣的那份痛。
而MV中Gigi與男主角有大量拖手擁抱、互餵蛋糕等甜蜜拍拖畫面，還要在遊樂場玩滾軸溜冰，但搞笑的是原來Gigi與男主角從未玩過滾軸溜冰，完全舉步難行，結果要脫鞋僅穿襪子站在冰上「扮溜冰」，兩人才鬆一口氣順利完成。未拍過拖的Gigi在拍攝時不時忍不住笑，她解釋：「其實我笑點比較低，我忍唔住笑唔係因為尷尬，係自己搞到自己笑，例如剛才我見到男主角出軌嘅訊息，對方留言話：「Do You Want Me？再加埋個心心emoji，我一見到就笑咗，覺得好肉麻，同埋我平時影相，啲人叫我比心心，我係唔會做，因為比心心我覺得有啲尷尬，所以剛才一見到就笑咗出嚟。」
